Na’a ku fanongo ki he ongoongo na’e tālanga’i ‘i he Fale hono fakangāue’i ‘e he Palēmia hono foha ko ‘ene personal assistant (P.A) ‘a ia ne tukuaki’i koe Nepotism, ko e lea muli ka ‘oku ‘uhinga ki ha filifilimānako ‘a ha taha pule pe ngāue ma’olunga ‘o ne ‘oatu pe hano fāmili ofi ki ha tu’unga ma’olunga ‘i he ngāue’anga ‘oku pule pe ma’u mafai ma’olunga ai. Na’a ku fakakaukau ko e tu’unga tipeiti ma’olunga na’e tonu ke a’u kiai ‘a e Fale. He ko e founga na’e tonu ke fua fekeli ki he fakamatala pe faka’uhinga ‘o e ongo fo’i lea, ko e personal assistant mo e nepotism, pea ko e fekau’aki ‘o e ongo ‘uhinga tene tataki ‘a e tipeiti ke fai.

‘Oku ou faka’amu ke pulusi mai mu’a ‘a e fakakaukau ko’eni fekau’aki mo e tu’unga ‘oku ‘i ai ‘a e matamata lelei ‘a e Hala Vuna mo hono uesia ‘e he kau fakamaketi ‘oku nau fakapalakuu’i (hufanga he fakatapu) ‘a e faka’ofo’ofa ‘o e feitu’u ni mo hono manakoa ‘e he kau folau’eve’eva. ‘Oku ou faka’apa’apa lahi ki he kakai ko’eni pehe ki he kau ngoue ‘o e fonua ka ‘oku ‘osi teu ‘e he Pule’anga ‘a e maketi hange koe Maketi Talamahu ke ‘ave kiai ‘a e fua ‘o e fonua. ‘Ikai ngata ai ka na’e toe tanu ‘e he Potungaue Ngoue mo e Potungaue Takimamata mo e Leipa ‘i he konga ki mui ‘o e ta’u kuo’osi 2014 ‘a e konga ‘i he tofi’a ‘o Fakafanua hanga hake pe ki he Hala Vuna kenau hiki kiai mo e ‘ikai pe.

‘Oku ou faka’apa’apa mo kole ki he feitu’una ke angalelei kae ‘omai mu’a ha’o tali ki he ngaahi fehu’i ko ‘eni ‘oku ha atu ‘i lalo.