Ta'ofi 'e Tonga ni ha toe folau mai mei Fisi Featured
28 'Epeleli, 2021. Kuo ta'ofi 'e Tonga ni ha toe folau mei Fisi hili ia 'a e mahino mai kuo ma'u 'a e ni'ihi 'i Fisi 'e he vailasi Covid-19 ka koe kalasi fo'ou ko'ene hu'u mei 'Initia (Indian Variant).
Na'e 'amanaki foki ke tu'uta 'a e folau mei Fisi ki Tongani he uike kaha'u koe konga ia hono fakafoki mai hotau kakai mei tu'apule'anga ka 'oku mahino mai koe tu'unga 'oku 'i ai 'a e Fisi 'e faingata'a ke faka'ataa ke tu'uta mai 'a e folau ia ko'eni.
Ko hono fakapapau'i mai ia 'i he 'aho ni mei he Pule Lahi 'o e MEIDECC Paula Ma'u.
'Oku toe kau pe foki heni ho hono kaniseli 'a e ngaahi pule mei Pilisipeini na'e 'amanaki ke tu'uta mai ki Tonga ni he ngaahi uike 'oku tau hanganaki kiai.
'Oku lolotonga fakataputapui foki 'a e ngaahi kolo lalahi 'o Fisi pea 'oku te'eki ke mahino mai pe kuo malava ke mapule'i 'a e mafola 'a e mahaki 'i he fonua.
'Oku mahino mai foki ia ko e ongo puna mei Nu'usila mo Pangopango na'e fakataumu'a ki he 'uluaki uike 'o Me 'oku tu'ulahoko pe ia.
