'Amanaki tu'uta vakapuna ua fakafoki mai hotau kainga 'i muli uike 'uluaki 'Akosi Featured
Faitaa 'a e MEIDECC
21 Siulai 2020. ‘Oku fakafuofua ‘e tū’uta mai ki Tonga ni ‘a e vakapuna hono ua ‘i hono fetukutuku mai ‘a e kakai Tonga ‘oku tuku vakā ‘i he ngaahi fonua muli ‘i he uike ‘uluaki ‘o ‘Aokosi.
Ko e ola ‘eni ‘a e fakataha ‘i he pongipongi ‘o e ‘ahó ni ‘a e Komiti Fakafonua ki he Ngaahi Me’a Fakatu’upake (NEMC). ‘A ia ‘e toki fakahū atu ki he Kapineti ke nau toki aofangatuku.
Ko e vaka ko ‘ení ‘e kamata ai ‘a hono ‘omai ‘a e kāinga Tonga mei Nu’usilá, ka ‘oku te’eki ai ke fakapapau’i ‘a e tokolahi ‘o e kau pāsese ‘e ‘omai.
Tu’unga ‘oku ‘i ai ‘a e ngāue ki he ngaahi nofo’anga ki he fakamavahe’i makehé (quarantine facilities)
Fakatatau ki he Pule Lahi ‘a e Potungāue Mo’ui Dr. Siale ‘Akau’ola, na’e fakahoko ‘a e sio ki he tu’unga ‘oku ‘i ai ‘a e ngāue ki hono fakalelei’i ‘a e ngaahi nofo’anga ki he fakamavahe’i makehé (quarantine facilities), ‘o kau heni ‘a e sio ki he Kemi Taliaí mo e Fale Mamata’anga Sipoti ‘i ‘Atelé (‘Atele Indoor Stadium).
Na’e fakahā ai ‘e he Sea ‘o e fakataha’angá ka ko e Minisitā ‘a e Potungāue MEIDECC Hon. Poasi Tei ‘oku fakahoko ‘a e sio ki he Kemi Taliaí ‘a ia ‘e lava ke nofo ai ‘a e toko 60 pea ‘oku fakafuofua ke ngāue’aki pea mo e Hotele Kupesi.
‘I he fakamatala ‘a e Pule Ngāue Le’ole’o ‘a e Potungāue ki he Ngaahi Ngāue Lalahí Lōpeti Heimuli, ‘oku ‘amanaki ke kamata ‘a hono fakalelei’i ‘a e Fale Mamata’anga Sipoti ‘i ‘Atelé ‘i he uike ni ‘a ia ‘oku fakafuofua ko e toko 200 tupu ‘e lava ‘o nofo ‘i lotó.
‘Oku fengāue’aki vāofi ai ‘a e Potungāue Mo’uí, Kau Tau ‘a ‘Ene ‘Afió, Potungāue Polisí, Potungāue ki he Ngaahi Ngāue Fakalotofonuá mo e ngaahi kupu fengāue’aki kehe ki hono fakapapau’i ‘e malu ‘aupito ‘a e feitu’u ni.
Na’e ‘ohake foki ‘i he fakataha’angá ‘a e fiema’u ke fakahoko ha talatalanoa mo e kakai ‘o e kolo ‘o Ha’ateiho kae pehē ki he Kolisi Tongá pea mo e ‘Apiako Lautohi Pule’anga ‘a ‘Atelé ki he ngaahi fokotu’utu’u ngāue ‘oku ‘amanaki ke fakahokó.
Foomu Lesisita ‘i he ‘initaneti ki he ni’ihi ‘oku nau faka’amu ke foki mai ki Tonga ni (online repatriation registration form)
Kuo a’u ‘eni ki he toko 2,724 ‘a e ni’ihi kuo nau lēsisita mai ‘i he foomu lesisita ‘i he ‘initaneti ki he kāinga Tonga ‘oku nau fie foki mai ki Tonga ni.
Fakatatau ki he Pule Lahi ‘o e MEIDECC, Paula Ma’u ko e toko 1,700 tupu ai mei Nu’usila ‘ata’atā pē ia ‘a ia ‘oku kau ki heni ‘a e kau ngāue muli ke tokoni ki he Potungāue Mo’ui mo e ngaahi Poloseki kehe ‘a e Pule’anga kae pehē ki he kau ngāue ‘i he ngaahi ‘Ofisi ‘a e kau Fakafofonga Tipilometika ‘a e ngaahi Pule’anga Muli.
