Kamata talatalanoa Lao Fakaangaanga ‘a e Ma’u’anga Ivi ‘i Vava’u Featured
Kau ngaue mei he ngaahi Potungaue 'a e Pule'anga na'a nau kau atu ki he polokalama
6 Me, 2020. "Ki ha lao Fakama’u’anga Ivi pe ‘e taha ‘oku hoa mo e laka ‘a e taimi pea ‘oku ne falute ‘a e sekitoa fakalukufua” ‘a e taumu’a ‘o e talatalanoa kuo kamata ia ‘i Vava’u Lahi ‘i he ‘aho ni.
Ko hono talanoa’i eni e lao fakaangaanga ki he ma’u’anga ivi fakalukufua ‘a e fonua kuo lava hono teuteu’i mo hono fa’u ‘e he kautaha Solution Consulting House-sch ‘i ha laumalie lelei ki ai ‘a e hou’eiki Kapineti mo e Pule’anga, mo e faka’amu ke lava ‘o fakatahataha’i ‘a e ngaahi lao ki he ma’u’anga ivi ‘oku tuha mo e lalaka ‘a e taimi pea ke lava ‘o tokanga’i lelei ange ‘a e ngaahi ngaue ‘i he sekitoa ‘o e Ma’u’anga Ivi.
Ko e taha pe eni ‘o e ngaahi ngaue ne fokotu’utu’u ‘i he palani halafononga ki he ma’u’anga ivi ‘o e fonua (term) 2010 – 2020, ‘a ia ‘oku ne talanoa mai ki he ngaahi liliu faka-tu’utu’u ni mo ha ngaahi liliu faka-lao kae lava a’usia ‘a e ngaahi ta’umu’a ‘i he sekitoa ma’u’anga ivi ‘a Tonga.
‘Oku ‘i Vava’u ni ai ‘a e Consultant Sela Broomfield , Talekita ‘o e Ma’u’anga Ivi, Dr. Tevita Tukunga mo e kau ‘ofisa ma’olunga ‘i he Va’a Ma’u’anga Ivi ‘o e Potungaue MEIDECC ke kamata ‘a hono talanoa’i e lao fakaangaanga ki he Ma’u’anga Ivi ‘o e fonua fakalukufua.
‘I ha me’a fakaava ‘a e ‘Eiki Kovana ‘o e Vahefonua, na’a ne fakamamafa’i ‘a e mahu’inga ke lava e ngaahi lao ‘o manava mo ngaue lelei ‘o ne fakahoa ki he ‘api ko Kulifekai mo hono fatongia ki he Hou’eiki mo e kakai ‘o Vava’u Lahi ‘i ono’aho. ‘I ha fakama’ala’ala ‘a e Talekita ‘o e Ma’u’anga Ivi, na’a ne fakamamafa’i ‘a e fatongia ‘o e Ma’u’anga Ivi ‘i he langa fakalakalaka ‘a e fonua fakalukufua pea mo e mahu’inga ke ‘ata ki tu’a ‘a e ngaahi ngaue fakama’u’anga ivi mo lava foki ‘o mapule’i lelei.
‘Oku kau mai ki he ngaahi talatalanoa ni ‘a e kau ‘ulu’i Potungaue, kau fakafofonga mei he ngaahi kolo pehe foki ki he ngaahi Kautaha taautaha. ‘Oku ‘amanaki ke hoko atu ‘a hono talatalanoa’i ‘o e lao fo’ou ki he ma’u’anga ivi ki he Vahefonua Ha’apai pehe foki ki ‘Eua ‘i he ngaahi uike ka hoko mai. Ko e ngaahi ngaue ni kotoa ‘oku fakapa’anga ia ‘i ha tokoni mei he European Union.
- MEIDECC
