Hokohoko atu pe ngaahi Fakangatangata Fakafonua ki he COVID-19 ^Featured

Ko hono fakahä eni ‘e he ‘Eiki Palemiá, Hon. Faifekau Pohiva Tu’i’onetoa ‘i ha fakataha makehe mo e ngaahi kautaha ongoongó ‘i he efiafi ‘o e ‘ahó ni, ‘i he Fale Fakataha’anga Fa’onelua.

Na’á ne pehē ko e tu’unga ‘oku ‘i ai ‘a Tongá ni he taimi ni ‘i he Ngaahi Fakangatangata Fakafonua ki he COVID-19, ‘e fakatatau pē ki he Kupu 36 mo 37 ‘o e Lao ki he Pule’i ‘o e Me’a Fakafokifā 2007.

“Fakatautau ki he kupu 30 mo e 37 ‘o e Lao ki he Pule’i ‘o e Me’a Fakafokifä 2007, ‘oku ou fakafo’ou ‘i heni ‘a hono ngāue’aki ‘o e Fanongonongo ‘o e Ngaahi Fakataputapui Fakafonua ki he COVID-19 (“Fanongonongo”) ‘o e ‘aho 17 ‘Epeleli 2020 ke ngāue’aki ki he kotoa ‘o e fonuá mo e ngaahi potu tahi ‘o Tongá ‘o kamata mei he 8:00 efiafi, Falaite 24 ‘Epeleli 2020 ki he 8:00 efiafi 1 Mē 2020, tukukehe ‘o ka toe fakafo’ou.”

Na’á ne fakamā’ala’ala foki ‘a e faka’amu ‘a e Minisitā ‘okú ne Tokangaekina hono Pule’i ‘o e Me’a Fakafokifä makatu’unga ‘i he Fanongonongo ‘o e Ngaahi Fakangatangata Fakafonua ki he COVID-19 (“Fanongonongo”) kuo tuku atu he ‘aho 06 ‘o ‘Epeleli 2020  pea toe fakafo’ou ‘i he ‘aho 24 ‘o ‘Epeleli 2020.

“Ko e palakalafi (7) ‘o e Fanongonongó, ‘i hono ngāue’aki ‘e he Siasi ‘Ahofitú ki he tauhi ‘o e ‘aho Sapaté, ‘oku ‘uhinga ia ki he vaha’a taimi ko e “tō ‘a e la’ā ‘i he ‘aho Tokonaki” ki he “tō ‘a e la’ā ‘i he ‘aho Sapaté.”

‘E toe fakahoko pē ha fakataha ‘a e ‘Eiki Palēmiá mo e ngaahi kautaha ongoongó ‘i he Falaite kaha’ú.

- MEIDECC