Ngäue fakataha Polisi mo e Sotia 'i he fakataputapui faka-fonua ^Featured

Fakatatau ki he fakamatala ‘a e Tokoni Komisiona Polisí, ‘Atunaisa Taumoepeau, “Na’e kamata pé ‘aneuhu he 8:00 pongipongí ‘a e ngäue atu ‘a e kau polisí mo e kau sotiá ‘o ‘a’ahi holo ki he ngaahi kolo pea mo siofi ‘a e ngaahi hala ‘e poloka’i koe’uhi pe ke fakapapau’i ‘oku mateuteu ‘a e fonua ki he fakataputapui fakafonua.”

Na’a ne pehe foki ko e Vahenga Nuku’alofá ‘oku fakafe’unga pé ‘a hono poloka’i ‘o e ngaahi hala mo e ivi ‘o e Potungäue Polisí pea toki tokoni mai ki ai ‘a e Kau Tau ‘a ‘Ene ‘Afio.

“Ko e Hala Vuná ‘e lahi ke tu’u ai e checkpoint pea ‘e malava pë ke ‘unu takai mei ai ki ha ngaahi hala kapau ‘e hola e kakai mei ngaahi ‘elia ko ení. Ko e ngaahi hala ki Hahake mo Hihifó, ‘e fai ’aki pe e fokotu’utu’u e ongo Pule Polisi ‘o e ongo vahenga ko ia.”

“Kuo ‘osi fakamafai’i foki e kau ‘ofisa polisi mo e kau sotia kenau fakahoko fatongia ‘i he ngaahi roadblocks ko ení pea ko e ‘ü me’alele kotoa pe tenau fou aí kuo pau kenau ta’ofi.”

‘I he lau ‘a Taumoepeau ‘e kau he ngaahi hala ko ‘eni hono le’ohi

• Hala Taufa’ahau ki Mata-ki-‘Eua ki he ‘Ofisi ‘o e Vai mo e ‘Uhilá,
• Hala Fatafehi pea mo e Hala Tupou Lahí,
• Hala Hihifo, ‘o kamata he pausa ‘i Hofoa,
• Hala Vuna ‘o fe’unga tonu pea mo e Tau’anga Pasi Hihifo.

Na’a ne kole foki ki he kakai ‘o e fonuá kenau talangofua mu’a ki he ngaahi tu’utu’uni ‘a e kau ‘ofisa kuo fakamafaí’i, kenau fakahoko fatongia lolotonga e vaha’a taimi ko eni.

“’Oku ‘ikai ko ha me’a si’isi’i eni ka ko e ‘uhingá ‘oku ‘ikai kete faka’apa’apa’i e tu’utu’uni koeni. Ko ia ai, kole atu ki he kakaí ko e faingamälie eni ketau fakamalohisino’i kitautolu ketau mahino’i koe hä e tu’unga ‘e a’u ki ai e fakatu’utamaki e mahaki ‘o lava ai ketau tokoni ki he malu e kakai e fonua.”