Tali 'a e PSC ki hono tukuaki'i 'e Losaline Ma'asi 'a e CEO MAFF ^Featured

‘Oku ‘i ai ‘a e faka’apa’apa mei he Komisoni (PSC) ka e tuku atu ‘a e ngaahi fakamatala ko’eni ‘fekau’aki pea tukuaki’i mo e taki hala na’e fai ‘e he ‘Eiki Minisita MAFF malolo, Hon Losaline Ma’asi ‘i he TV Tonga pea mo e letio fekau’aki pea mo e fakaloloa ‘a e aleapau ngaue ‘a e CEO ‘o e MAFF ko Toketa Viliami Manu.

1. Koe tukuaki’i ‘a e MP Losaline ‘oku takihala mo ‘ikai ha makatu’unga mo’oni. Ko e fakaloloa ‘o ha aleapau ngaue ‘o ha CEO ‘oku pau ke fai ki he tu’utu’uni ‘a e Lao Ngaue FakaPule’anga.

2. Na’e fakahoko a e aleapau a e CEO MAFF ‘o fakatatau mo e lao. Koe sivi’i ‘o e fakahoko fatongia ‘a e CEO ‘oku fai ‘e he Komisoni ‘i he’enau fengaue’aki mo e Minisita.

3. Ko e fakahoko fakata’u e vakai’i e fakahoko fatongia ‘o ha CEO kau ai e CEO MAFF (PMS)‘oku kau ai ‘a ‘ene fakahu ki he Minisita ‘ene vakai faka iate ia pe ki he’ene fakahoko fatongia. ‘E vakai’i eni ‘e he Minisita pea mo fakaha ai ‘ene fakakaukau ki he tu’unga fakahoko fatongia.

4. Na’e fakahu pe ‘e Dr Manu ‘ene PMS ki he Minisita. ‘I he ‘osi e fakafonu he’e Minisita pea ‘oku tonu ke na fepotalanoa‘aki ki he’ena fakamaaka. Na’e ‘ikai lava eni.

5. Ne ‘ikai ke lava ke fakahu e lipooti a e CEO mei he Minisita ki he Komisoni ‘i he taimi na’e fiema’u ai ‘o ‘osi e uike ia ‘e ono (6) mei he taimi totonu ‘a ia ne fakaha ai ‘e he Minisita ‘a ‘ene ta’efiemalie ki he fakahoko fatongia ‘a e CEO MAFF.

6. Na’e ‘ikai ha faingamalie ne ‘oange ‘e he Minista ki he CEO kena talanoa ki he’ene ta’efiemalie ki he‘ene fakahoko fatongia. ‘Oku fiema’u eni ke fai koe‘uhi he ‘oku ‘i ai ‘a ‘ene totonu fakanatula ki ai. Kaikehe, na’e fakatokanga’i pe ‘e he Komisioni a e lipooti mei he Minisita.

7. Ko e taimi ki hono vakai’i‘a e fai fatongia (PMS) ‘a Toketa Manu ko e 1 Siulai 2018 – 30 Sune 2019. Na’e toki hoko pe ‘a Hon Losaline Ma’asi koe Minisita Ngoue ‘i Fepueli 2019, ‘a ia ko e mahina ‘e 4. Ko Hon Semisi Fakahau na’e Minisita ia he mahina ‘e 8 ki mu’a pea ko’ene vakai’i e fakahoko fatongia ‘a Dr Manu na’e tala oku lelei aupito.

8. ‘Oku ngaue’aki moe ngaahi me’afua kehe hange koe lipooti fakata’u, lipooti fakamahina ono, lipooti fakapa’anga a e MAFF, tanaki pa’anga pea mo e ‘u fakamatala kehe mei he Ompatimeni, Atita mo e PSC ki hono vakai’i ‘e he Komisoni ‘ae tu’unga ‘oe fai fatongia fakalukufua ‘ae CEO.

9. ‘Oku tala ‘e he ngaahi fakamatala ni, ne fakafiemalie pe ‘a e fakahoko fatongia ‘a e CEO MAFF. Na’e toe fakahoko ‘e he Komisoni ‘a e fepotalanoa ‘aki faka’auliliki mo e CEO koe konga peia ‘o e polokalama ‘one fakapapau’i ai ‘a e tu’unga fakahoko fatongia ‘a e Potungaue.

10. Hoko foki ‘eni pea moe taimi fakaloloma koe pekia ‘a e‘Eiki Palemia. Koia ai na’e ta’ofi ‘ae ngaue fekau’aki mo Toketa Manu kae ‘oleva kuo hoko mai ha Pule’anga fo’ou he koe anga maheni pe ia ‘i he fakahinohino fakalao.

11. Koia ‘i he hoko mai ‘ae ‘Eiki Minisita fo’ou, Hon Tu’ilakepa, fakahoko leva ‘e he Komisoni ‘a hono fatongia ‘i he lao ke fakahoko kiai ‘a e tu’unga ‘oku ‘i ai ‘a e ngaue fekau’aki pea mo Toketa Manu ‘o toki fai ha’ane fai tu’utu’u ni ke makatu’unga mei ai ‘a e hoko atu ‘a e fatongia ‘a e PSC.