‘Aho Malōlō Faka-Pule’anga Falaite 15 Novema faka'ilonga'i ikuna kafakafa 'a e maa'imoa Liiki Featured
12 Novema 2019. Kuo fakapapau'i mei he Pule'anga 'e fakahoko hano faka’ilonga’i ‘a e ikuna kafakafa mo fakahisitōlia kuo fakahoko ‘e he Timi ‘Akapulu Liiki Tonga Invitational XIII, ‘i he fe’auhi ki he Ipu Oceania 2019 ‘o nau ikuna’i ‘a e timi Laione ‘o Pilitānia mo e Kangaroos ‘o ‘Aositelēlia.
Makatu'unga 'i he ongo ikuna faka-hisitolia ni, kuo tuku mai 'e he Pule'anga ha fanongonongo ke mea’i ‘e Hou’eiki kaeuma’a ‘a e kakai ‘o e fonuá, 'a e tu’utu’uni ‘e he ‘Eiki Palemia mo e Hou’eiki Kapineti ‘a ‘Ene ‘Afió ‘i he ‘aho 11 ‘o Novema ke hoko ‘a e ‘aho Falaite 15 ‘o Novema 2019, ko e ‘Aho Malōlō Faka-Pule’anga Makehe ki he kotoa ‘o e ‘Otu Tonga ni.
Ko hono fakalangilangi’i 'eni ‘e he Pule’anga Tonga ‘a e va’inga malie, ikuna mo e taleniti va’inga liiki ‘o e fanau Tonga.
