Hopoki ‘e He'ene 'Afio Tupou VI ‘a e MV Olovaha Featured
Ha’ēlea 'e he 'Ene 'afio, Kingi Tupou VI 'a e vaka toho MV Olovaha
22 Mē, 2019. Na’e hopoki ‘e he Tama Tu’í, Kingi Tupou VI vaka toho pea moe vaka pailate ko e MV Olovaha pea na’e fakamonuka ‘e he Ta’ahine Kuiní ‘a e lipiné ‘i he pongipongi ‘o e ‘ahoˊni ‘i he Uafu Taufa’ahau Tupou IV.
Ko e vaka ni na’e fakatau mai ia ‘i Fepueli ‘o e ta’u ni mei he kautaha ‘Aositelelia ko e Pacific Marine Group ‘o fe’unga hono mahu’ingá mo e AUD$1.56 miliona ‘a ia na’e fe’unga ia mo e pa’anga Tonga ia ‘e $2.1 miliona.
‘I he fakamatala ‘a e Pule Lahi ‘a e Ma’u Mafai ki he Ngaahi Taulangá Mosese Lavemai ko e vaka ni ‘oku fe’unga hono loloa mo e mita ‘e 23, ko hono fālahí ko e mita ‘e 8, ko e lolotó ko e mita ‘e 4.25. Ko hono mamafá fakataha mo ha uta ko e toni ‘e 168.
Na’a ne fakahā foki ko e vaka ni kuo ‘osi fakanaunau kakato ke fe’unga ki he folau loloá pea ‘oku ‘i ai mo e mīsini ma’ama’a ‘e ua mo e mīsini pamu tānaki mama.
“Ko ia ai ka hoko ha vela ki ha vaka ‘oku no’o ki he uafú ‘e malava ‘e he Olovahá mo ‘ene mīsini pamu ke tokoni ki ha fakatamaki ‘e hoko.”
“Ko e ‘epoki fo’ou ‘eni ki hano malava ‘e he poaté ‘o fakatau ha vaka toho ke tokoni ki he MV Hifofuá lolotonga ko ia ‘oku lolotonga fai e ngāue ki hano kole ha tokoni ke ne fakapa’anga mo fo’u ha vaka toho ke ne fetongi ‘a e MV Hifofuá ‘i ha taimi.”
Fakatatau ki he fakamatala ‘a e Sea ‘o e Poate ‘a e Kau Talekitaˊ, Toketā Sione Ngongo Kioa na’e fakatau ‘e he Poate Taulangá ‘a e vaka ni ke fakahoko ‘aki ‘a hono fatongia mahu’inga ki he taulanga Nuku’alofá ke faka’ai’ai ‘a e fefakatau’akí, takimamatá, mo e fefononga’aki ‘i tahí ‘i Tonga ni.
“’Oku vave ange pea mo hikihiki tō ‘a e fiema’u ‘a e kakai ‘o e fonuá pea moe ngaahi pisinisú ‘i he ngaahi koloa,fiema’u faka’ahó, koloa langá, pea mo lahi ange ngaahi koloa mei tu’apule’angá neongo ‘oku lahi ‘etau fe’amokaki he fēfakatau’akí.”
Na’e pehe foki ‘e Toketā Ngongo kuo vivili ‘a e ngaahi fiema’u ki ha vaka toho mo e vaka pailate ke lele fakataha mo e MV Hifofua ke malava ‘o fakatautau mai ’aki ‘a e ngaahi vaka uta koloa ‘oku lalahi angé moe ngaahi vaka meili lalahi angé.
- MEIDECC
