Toe 'ave faka-Falemahaki 'a e Palēmia ki Nu'usila Featured
‘Eiki Palēmia, Hon. Samuela ‘Akilisi Pohiva 'i he Falemahaki Vaiola
30 'Epeleli, 2019. Kuo tuku mai 'i he 'aho ni ha ongoongo tukuatu mei he 'Ofisi Palēmia 'o fakahā ai ki he ngaahi kautaha ongoongo 'oku ‘amanaki ke fakahoko ha faito’o fakafalemahaki ‘o e ‘Eiki Palēmia, Hon. Samuela ‘Akilisi Pohiva ‘i he Falemahaki Mercy ‘i ‘Aokalani, Nu’usila 'i he ‘aho 8 ‘o Mē, 2019.
Ko e ongoongo ko'eni 'oku ne fakapapau'i mai 'e toe 'ave faka-Falemahaki 'a e Palēmia ki Nu'usila ke fakahoko ai 'a e faito'o ko'eni he koe ma'u 'a e ongoongo ni 'oku lolotonga 'i Tonga ni 'a e Palēmia 'i he Falemahaki Vaiola.
Na'e toe 'omai foki 'i he ongoongo ko'eni mei he 'Ofisi Palēmia mo e fakamatala ‘a Toketā Sione Lātū, ko e Mataotao Fakafaito’o ‘i he Falemahaki Vaiola, 'a ia na'a ne fakahoko ‘a hono sivi fakafaito’o ‘o e ‘Eiki Palēmia pea ne mahino ‘oku ‘i ai ‘a e ki’i palopalema ‘i hono ‘ate pea ‘e fakahoko ‘a hono ki’i faito’o ‘i he ‘aho 8 ‘o Mē.
Na'e toki foki mai pe 'a e ‘Eiki Palēmia mei Nu'usila 'i he uike kuo maliu atu hili ha'ane folau faka-Faito'o pea ko'eni 'oku mahino mai 'e toe fakafolau pe ki Nu'usila.
Kuo fuoloa foki 'a hono fehu'ia 'a e tu'unga 'oku 'i ai 'a e mo'ui 'a e Palēmia pea 'oku 'i ai 'a e fakamālō ko hono 'omai 'a e ongoongo ko'eni he 'oku mahu'inga ke 'ilo kiai 'a e kakai 'o e fonua.
2 comments
-
'E hange pe motu'a ni ko 'Uliti Uata, puke pe pea ko 'ene meimei 'osi pe taimi puke pea teke mai pe ki Falealea ke toe lau fo'ou 'ene puke ka e kei vahe pe. Ko e ongo taki eni 'o e Temokalati fo'ou pea ko e anga ia 'o 'enau 'ofa mo mamahi'i fonua. Ko e puke pe 'ave ki muli 'oku mamafa tatau ai pe pe 'oku kei lava lelei 'a e fatongia te nau kei piki pe he lakanga ke kei lava 'ave kinautolu ki muli.
-
Me'a faka'ofa mo'oni ko e Palemia. Tuku aa si'ono fakamamahi'i hono sino kae si'i malolo aa. Faka'ofa lahi, fai ho'o mou holi PTOA ke kei pukepuke ehe PM e power kae toe kovi ange 'ene mo'ui 'a'ana. 'E tafa ena pea 'e foki mai 'o fakaakeake ia ai ha ngaahi mahina, kae fefe 'a e Fonua mo e ngaue na'e fili ia kiai. 'Osi atu e Pule'anga na'e veteki mo e folau, koeni 'e 'osi e teemi koeni mo e tokoto falemahaki. Faka'ofa 'aupito.