Ui hono ua ki he Pa’anga Talasiti ki he Feliuliuaki ‘o e ‘Ea Featured
Ko e 'Ofisa Ma’olunga ‘oku ne tokangaekina ‘a e Pa’anga Talasití, Feleti Fa’otusia, mo e kau 'Ofisa Kolo 'o e vahenga Hihifo hili 'a e ako 'i he loki fakataha'anga 'o e Va'a Feliuliuaki 'o e 'Ea 'i he 'Ofisi 'o e MEIDECC
18 Sanuali, 2019. Na’e kamata ‘i he Tusite ‘o e uiké ni ‘a e ako ki he ngaahi kolo fekau’aki mo hono fakafonu ‘o e ngaahi foomu kole tokoni (application form) ki he Pa’anga Talasiti Feliuliuaki ‘o e ‘Ea, ‘i he loki fakataha’anga ‘a e Va’a Feliuliuaki ‘o e ‘Eá ‘i he ‘Ōfisi ‘a e Potungāue MEIDECC.
Ko e taumu’a ‘o e polokalama pa’anga tokoni ko ‘ení, ke tokoni’i ‘a e ngaahi komiunitī kotoa pē ‘o Tongá, ke nau lava ‘o matu’uaki e ngaahi faingata’a ko ia ‘o e feliuliuaki ‘o e ‘eá.
Ko e ui hono ua ‘aki ‘eni ki he ngaahi komiunitī felāve’i mo e Pa’anga Talasiti, ‘a ia na’e lava ‘o fakakakato ‘a e fuofua uí ‘i he ta’u kuo ‘osí, ‘o tali ai ‘a e ngaahi tohi kole ‘e 33.
Na’e kamata ‘e he Vahe Hahaké ‘a e ako ko ‘ení, pea hoko atu ki he Vahe Hihifó. Na’e hoko atu ki he Vahe Lotó ‘aneafi pea toki faka’osi ‘e he Vahe Nuku’alofá ‘i he ‘aho ni. ‘E hoko atu ai pē ‘a e ako ki Vava’u, Ha’apai pea mo ‘Eua ‘i he uike ka hoko mai.
Fakatatau ki he ‘Ofisa Ma’olunga ‘oku ne tokangaekina ‘a e Pa’anga Talasití, Feleti Fa’otusia ‘oku mahu’inga ‘aupito ‘a e ako ko ‘ení ki hono fakafonu ke tonu ‘a e ngaahi foomu ke a’usia ‘a e ngaahi taumu’a totonu ‘o ‘enau ngaahi kolé.
Na’e fakahā foki ‘e Fa’otusia ‘oku hā mai mei he toe tokolahi ange ‘a e ni’ihi ‘oku nau kau mai ki he ako ‘i he ui hono uá ‘a e toe lahi ange ‘a e fiema’u vivilí mo e toe mahino ange ‘a e polokalama tokoní ki he kakai ‘o e fonuá.
- MEIDECC
