Alea Palemia, ‘Ea Nauru mo e Real Tonga ki ha puna mei Tonga ki Brisbane ^Featured

Ne me’a ‘a e ‘Eiki Palemia ‘o pehe, “Na’a ku fakataha mo e kau fakafofonga mei he komuiniti Tonga ‘i Brisbane ‘i he’eku fetongi vaka ai ki Papua New Guinea ki he fakataha ‘a e APEC ‘i Novema pea na’a nau fakahoko mai ‘oku ‘ikai ha kautaha te
nau fie fakahoko ha fepuna’aki hangatonu mei Tonga ki Brisbane ka ko e kautaha vaka ‘Ea Nauru ‘oku nau lotolahi ke nau fengaue’aki fakataha pea mo e Real Tonga mo e Pule’anga ‘o Tonga ke fokotu’u e halanga vaka fo’ou ni.

Pea na’a ku fakahoko ange ‘oku ou loto lelei ke fakahoko ha fakataha mo e ongo kautaha ni.

“‘Oku ou pehe na’e ola lelei ‘aupito e ngaahi talatalanoa na’a mau fai he ‘aho ni”.

Na’e pehe ‘e Mr. Jensen, “Hili ‘a e ngaahi talatalanoa pea mo e komuiniti Tonga ‘i Brisbane ‘i he konga kimu’a ‘o e ta’u ni na’e ‘a’ahi mai ai ha timi mei he ‘Ea Nauru ki Nuku’alofa ‘i ha fakataha hono 69 ‘a e Ngaahi Kautaha Vakapuna ‘o e Pasifiki
Tonga (ASPA) ‘i he mahina ko ‘Okatopa.

Na’a nau fakahoko ai ha fakataha makehe mo e Real Tonga pea mo e Tokoni Palemia, Hon. Semisi Sika.

Ne mau puke e faingamalie ni ke mau toe ‘a’ahi tu’o ua mai ai koe’uhi na’a mau fiefia ‘i he ngaahi me’a na’e fai ki ai ‘emau vakai kimu’a pea ‘oku mau tui ‘e ola lelei ‘aupito ha’amau fengaue’aki fakataha ki he kaveinga ni ‘i he kaha’u”.

Na’e pehe ‘e Tevita Palu, “’Oku fiefia ‘a e Real Tonga ke hoangaue mo e kautaha vakapuna ‘Ea Nauru pea mo e Pule’anga ‘o Tonga ‘a ia ‘e kau lelei ia ki he kakai ‘o Tonga pea mo e tu’unga faka’ekonomika ‘o e fonua.

Pea neongo ‘oku kei ‘i ai pe pea mo e ngaahi tafa’aki kehe ke fai hano siofi pea mo e ngaahi mata’ifika ke fai hano talanoa’i, ‘oku ou poupou kakato ki he fengaue’aki koeni.”