‘Ikai fu’u mahino ‘a e tu’unga ‘oku ‘i ai ‘a e Pule’anga ^Featured

‘Oku mahino pe ‘oku tengetange ‘a e Palēmia pea ‘oku ‘i he tu’unga fakatu’utamaki ‘i he Falemahaki Vaiola ka ‘oku ‘ikai ke mahino pe ‘oku hu’u ki fē ‘a e tu’unga ‘oku ‘i ai ‘a e Pule’anga pehe ki he Kapineti.

‘Oku te’eki ke tukuange mai ‘e he ‘Ofisi ‘o e Palēmia pe koe va’a Fakamatala ‘a e Pule’anga ha ongoongo tukuatu ke fakamahino ki he fonua ‘a e tu’unga mo’oni mo totonu hono fakanofo ‘o e kau Minisitā mo e Kapineti pehe ki he tu’unga faka’ofisiale ‘o e ngaahi fakanofo.

‘I he’ene pehe leva koe ngaahi mītia faka-sōsiale pe ‘oku nau tuku mai ‘a e ngaahi fakamatala ‘a ia ‘oku muimui ai ‘a e tokolahi neongo ‘oku te'eki fakapapau'i pe moia.

‘I he taimi tatau ‘oku kei tukumai ‘e he ongoongo ‘a e Letiō Tonga ‘a hono talitali ‘e he ngaahi Potungāue ‘enau kau Minisitā ka ‘i he taimi tatau ‘oku te’eki ke mahino ‘a e tu’unga faka’ofisiale ‘o e ngaahi fakanofo he ‘oku longo ‘a e ‘Ofisi ia ‘o e Palēmia pehe ki he Pule’anga.

Kuo toutou fai ‘a e fetu’utaki ki he ‘Ofisi ‘o e Palēmia mo e ‘ikai ha tali mahino pea ‘i ai mo e hoha’a lahi ‘i he tu’unga ‘ata ki tu’a mo tali ui ‘oku ‘i ai ‘a e Pule’anga he ‘aho ni he ‘oku fu’u fiema’u ke tukumai ki he fonua ‘a e fakamatala mo’oni.

Kuo ma’u mo e fakamatala na’e lele ‘a e fakataha ‘a e Kapineti he ‘aho ni ka ‘oku ‘ikai ke mahino pe ko hai na’e sea pehe ki hono tu’unga faka’ofisiale.

‘Oku mahu’inga ‘a e fakamatala ki he fonua he ngaahi aho ni pea ke tatau ‘a e ma’u ‘a e Tonga kotoa ki he tu’unga ‘oku ‘i ai honau Pule’anga.