'A'ahi Ako Tokamu'a Tonga Footsteps Community Preschool ki Nu'usila ^Featured

‘Oku ui pe foki ‘a e polokalama ‘a’ahi ko’eni ko e Tonga Footsteps Community Preschool New Zealand Tour 11-22 September 2015.

‘Oku mahino pe foki ko e fuofua Ako Tokamu’a ‘eni mei Tonga kuo nau fuofua ‘a’ahi kiha fonua muli ‘i he ‘uhinga fakaako pea ‘oku fakafuofua ki he toko 80 tupu ‘a e kau folau ko’eni ‘o meimei vaeua tatau pe ‘a e mātu’a tauhi fānau mo e longa’i fanau ‘a e ki’i ako’anga ni.

Fakatatau ki he fakamatala ‘a e Puleako ‘o e ki’i ako’anga ni Henrietta Latu ‘oku fakafiefia ‘a e ‘a’ahi mai ko’eni he ‘oku tokoni lahi ‘eni ki hono fakataukei ‘o e longa’i fānau ki he ‘ātakai fakaako fo’ou ‘a ia ‘oku toe kehe ange ia ‘o malava ke nau taukei’i mo sio tonu ki he ngaahi me’a ‘oku nau sio fakatātā pe ai mei Tonga.

‘Oku kau foki ‘i he polokalama ‘a e a’ahi ‘a e ki’i ako’anga ni ‘enau ‘a’ahi atu ki he Zoo, Misiume, ngaahi paaka va’inga mo fakafiefia kaē pehe ki he ngaahi feitu’u ‘iloa ‘i ‘Aokalani ‘oku ‘ahia ‘e he fānau iiki ‘i he ta’u ‘o e ako tokamu’a (kindergarden). ‘Oku ‘i he vaha’a ta’u 2 ki he ta’u 5 ‘a e longa’i fānau ‘oku kau mai ‘i he polokalama ‘a’ahi ko’eni.

“‘Oku tatau mo e hā ‘a e fiefia ‘a e fanau he polokalama ‘a’ahi mai ko’eni pea ‘oku ‘i ai ‘a e ongo’i ‘oku ‘aonga ‘a e folau mo e fakamole ‘oku fakahoko”, ko e fakahā ia ‘e Pita Pepa ko e taha ‘o e kau tauhi fanau ne lava mai he folau.

Ko e fakamole ki he folau ni na’e fua pe ‘a e ngaahi fakamole ‘e he mātu’a tauhi fānau pea na’e ‘i ai mo e tokoni ‘a e ngaahi kautaha faka-Pule’anga mo e ngaahi pisinisi ‘i Tonga hangē ko e Tonga Development Bank, Asco Motors, Yummy Retreat, Tonga Ports Authority, Narottams, A & A Trading Limited mo e Pangikē BSP. Na’e toe lele pe foki ‘a e ngaahi feinga pa’anga na’e fakalele ‘e he kau faiako mo e fānauako ‘a ia na’e ma’u ai ‘a e seniti ke tokoni ki he ngaahi fakamole ‘i Nu’usila ni.

‘Oku tatau pe foki ‘a e fakamatala ‘a e matu’a tauhi fānau ki he ongoongo ‘a e Nepituno ‘a ia ‘oku hā mai mei ai ‘a ‘enau loto fiefia mo māfana ‘i he lava mai ‘a e folau ko’eni pea ko e me’a mahu’inga kiate kinautolu ko e fiefia ‘a ‘enau fānau mo malava kenau ako ha me’a fo’ou.

‘Oku ha mai pe foki mei he’enau fakamatala ‘oku ‘ikai kenau lau ‘a e fakamole ka ‘oku nau sio loloa ki he kaha’u si’enau fanau. ‘Oku ‘amanaki ke lava kakato ‘a e polokalama ‘a’ahi ko’eni ki he ‘aho 22 ‘o e māhina ni pea toki foki atu leva ‘a e kau folau ki Tonga.