Fuofua Konifelenisi Fakaako 'i he Filosofia ‘o e Pasifiki ^Featured

‘Oku fokotu‘utu‘u mo fakahoko ‘a e fua konifelenisi ni ‘e he Kolisi Tohitapu ‘a e Pasifiki (PTC) mo e PIANGO ko e Ngaahi Kautaha Ta‘efakapule’anga ‘a e Pasifiki fakataha mo e ‘Univēsiti ‘a e Pasifiki Tonga (USP) mo e ‘Univēsiti Fakafonua ‘o Fisi (FNU).

‘Oku fokotu‘u ‘a e tefito‘i kaveinga ‘o e konifelenisi ko e filosofia ‘a e Pasifiki (Pacific philosophy) ‘o hangē ko e fakakaukau faka-Tonga ‘o e tā (time) mo e vā (space) mo e fuo (form) mo e uho (content) mo e ngaahi ‘ilo (knowledge) mo e poto (skills) fūfū tu‘ufonua pea mo e kaveinga si‘i ko e ngaahi filosofia fakafekau‘aki ‘a e Pasifiki (Pacific relational philosophies) ‘o hangē ko e tauhivā mo e fatongia mo e mate mo e mo‘ui mo e fonua mo e moana moe hā fua.

Kuo fakaafe‘i mai kau mataotao kehekehe mei he ngaahi fonua kehekehe he ngaahi ‘ilo mo e poto ‘a e Pasifiki ko e ngaahi lea tefito he konifelenisi ni ‘o kau ai ‘a Afioga Tama Aiga, His Highness Hon. Tui Atua Tupua Tamesese Taisi Efi ‘o Ha‘amoa mo Professor Unaisi Nabobo-Baba ‘o Fisi mo Prof. Dr. Manulani Meyer ‘o Hawai‘i mo His Highness Hon. Sir. Justice Taihākurei Durie ‘o Aotearoa mo Professor Konai Helu-Thaman mo ‘Akipisope Dr Winston Halapua ‘o Tonga mo e tokolahi kehe pē.

‘Oku kau ‘a Maui-Tāvā-He-Ako Associate Professor Dr Tēvita O. Ka‘ili mo Hūfanga Professor Dr ‘Ōkusitino Māhina (‘o fakafofonga‘i ‘a e Tonga International Academy mo e Vava‘u Academy for Critical Inquiry and Applied Research) hono fakaafe ki he konifelenisi ni. ‘Oku tefito ‘ena lea he filosofia/teolia makehe mo fo‘ou ‘a e tā-vā (time-space) ‘o e ‘iai, ‘a ia ‘oku na takimu‘a hono taukave mo ha tokolahi kehe he ngaahi mala‘e kehekehe mo e ngaahi ‘univēsiti kehekehe ‘i mamani.