Ola lelei ako fanau Tonga: ‘Ofisi ‘Amipasitoa Tonga ‘i Siaina Featured
Isaiah Takau mo 'ene tangata'eiki mo hono famili. Ko Isaiah na'e ma'u hono mata'itohi Master of Science with Honors 'i he Clinical Pharmacology mei he NanChang University, Jianxi
29 Sune, 2017. Ko e mahina faka’osinga foki ‘o e mahina ko Sune ‘i Siaina ‘oku ne faka’ilonga’i ai ‘a e faka’osinga ‘o e faha’i ta’u fakaako pea ki he fanau ako Tonga ‘oku laka hake he toko 70 ‘oku nau feinga ako ‘i Siaina, koe ngata’anga ‘eni ‘a e faha’i ta’u ako ki he tokolahi ‘o kinautolu.
Ko e toko 20 foki ‘i he toko 70 ko’eni ‘oku nau ako ‘i he Kolomu’a Beijing ‘o fakatatau ki he ongoongo tukumai mei he ‘Ofisi ‘Amipasitoa ‘a Tonga ‘i Siaina.
Na’e fakahoko foki ‘a e lotu taha ‘a e fanau ako Tonga ‘oku nau ‘i Beijing fakataha mo honau ngaahi famili ‘a ia ‘oku nau lava mai ke kau ki he tānaki tu’unga ‘a e fanau kuo lava ‘enau ako.
‘Oku faka’ilonga’i foki heni mo e fanau kuo lava ‘a e ta’u ‘e 1 ‘enau ako ki he lea faka-Siaina ‘i Beijing pea tenau mavahe atu ki he tapa kehekehe ‘o Siaina ke hoko atu ai ‘enau ako.
Fakatatau ki he fakamatala mei he ‘Ofisi ‘Amipasitoa Tonga ‘i Siaina, ‘oku nau fiefia ke fakahā kuo lava’i lelei ‘e he fanauako ‘e toko 9 ‘enau ako ‘i Siaina. Ko e toko 5 na’e lava lelei pe ‘enau ako ‘i Beijing pe pea koe tokotaha na’e lava lelei ‘ene ako ‘i Shandong, tokotaha ‘i Jianxi, tokotaha ‘i Wuhan pea mo e tokotaha ‘i Jilin.
Ko e toko 5 na’e lava’i lelei honau faka’ilo Masters, tokotaha na’e lava’i lelei ‘a e Master with Honors pe koe lava ma’olunga ‘i he levolo MA pea toko 4 na’a nau lava’i lelei ‘a e faka’iloa BA.
Ko kinautolu leva ‘eni-
1. Isaiah Takau – Master of Science with Honors in Clinical Pharmacology mei he NanChang University, Jianxi
2. Uaisele Mafi – Master in Medicine, Shandong University, Beijing
3. Sioana Yasmina Fili – Master in Applied Economics, Capital University of Economics and Business, Beijing
4. Karen Lupe ‘o e Melino Rosamond - Master of Enterprise Management, Beijing University of Science and Technology, Beijing
5. Taufa Tua - Master of Agricultural Science, Huazhong Agricultural University, Wuhan
6. Joseph Daniel ‘Aho - Bachelor of Law, China University of Political Science and Law, Beijing
7. Manase Fuakava Ki he Mate Halafihi - Bachelor in Sports Management, Beijing Sports University, Beijing
8. Florida Afeaki - Bachelor in Business Administration, Beijing University of Science and Technology, Beijing
9. Siunipa Mafua -Bachelor of Medicine and Bachelor of Surgery (MBBS), Beihua University, Jilin
Na’e fakamālō’ia ai pe ‘e he ‘Amipasitoa Tonga ki Siaina pehē ki he’ene kau ngāue ‘a e tokoni ‘a e Pule’anga Siaina ki Tonga ‘i he tapa kehekehe ‘o e ako mo e mo’ui pehe ki faingamalie ako toe ma’olunga ange ‘a ia ‘e tokoni lahi ‘eni ki hono langa ‘o e fonua ‘i he tapa kehekehe ‘i he taimi tenau foki ai ki Tonga.
2 comments
-
Malo mu'a Siaina, mou fai ma'u pe e ngaue lelei ma'a e ki'i fonua si'i mo ta'emaau kae fai pe si'ono siolalo'i ho'o mou 'ofa mo e tokoni kotoa.
-
'Oku fakafiefia ma'u pe 'a e ola lelei 'a e ako 'etau fanau 'i muli pea koe tapuaki ia ki he fonua. 'Oku toe fakafiefia foki koe mahino 'oku tokangaekina kinautolu 'e hotau ngaahi 'ofisi 'i muli hange koia 'oku hoko 'i Siaina. Malo 'Amipasitoa e poupou kihe'etau fanau.