Kapau na’e ‘ikai ha software ‘a Piveni koe hā na’e totongi ai ‘a e $200,000? ^Featured

Kuo fakahā mahino ‘e he Palēmia ‘i he feme’a’aki ‘a e Fale Alea ‘i he uike ni ‘i hono ‘eke kiate ia ‘e he Fakafofonga Nōpele Fika 1 Vava’u Lord Tu’ilakepa na’e pea ‘oku ‘ikai ha software ia ‘a Piveni Piukala.

Na’e toe fakamatala foki mo e Tokoni Talēkita mei he Potungāue Ako ko ‘Isikeli Oko ‘i hano faka’eke’eke ia ‘e he Letio 87.5 ‘i he uike ni ai pe pea na’a ne toe fakahā ai pe na’e ‘ikai pea ‘oku ‘ikai ha software ia ‘a Piveni.

Kapau leva ko e mo’oni ‘eni pea ‘oku fehu’ia lahi ‘a e tu’unga falala’anga ‘o e Palēmia ka ko e Minisitā Ako malōlō pehe ki he’ene kau ‘Ofisa Ako ma’olunga pehe foki ki he matāpule fa’u naunau mōlū (software) ko’eni.

Na’e ‘osi talaki ‘o ‘ilo ‘e he fonua ‘a e ‘uhinga hono haea ‘o Piveni pea pehe ki hono toutou faka’eke’eke ‘o Piveni ‘e he ngaahi mītia ‘o kau ai ‘ e Televīsone Tonga na’e mahino mei ai hono lohiaki’i ‘o e fonua ‘oku ‘i ai ‘a e polokalama fakakomipiuta ‘oku fa’u ‘e Piveni kene solova ‘a e palopalema ‘o e holo ‘a e ako ‘i he fonua.

Ko e tukuaki’i tokua koe holo ‘a e ako he ngāue ‘a e maaka tulifua (standardization) pea ko e ‘uhinga ia ‘o e hiki ki he maaka to’ofua (raw marks) mo e software ‘oku fa’u tokua kene fakalelei ‘eni.

‘Oku fu’u tōtu’a hono lohiaki’i a e kakai ‘o e fonua 'i he funga 'o e ta'eufi, fiepoto mo e 'afunga pea 'ikai tala e mahino mo e mo'oni ki si'i kakai 'o e fonua kae faka’apē tokua pe. Ko e hia fai’ilo ‘eni hono pā’usi’i ‘a e ako ‘i he fonua kae pehe ki he pa’anga tukuhau ‘a e fonua mo hono kakai.

Ko e pa’anga ‘e $200,000 na’e totongi ko’eni kia Piveni na’e ‘uhinga ki he hā?

Na'e mei fakalelei 'aki 'a e fu'u pa'anga ko'eni ha lokiako 'i motu pe koe kumi ha failautohi pe faiako high school ki he ngaahi motu mo e feitu'u 'oku nau fu'u fiema'u vivili.

‘Oku fiema’u ke ‘ilo ‘a e kakai ‘o e fonua kiai he kuo mahino mai ‘eni mei he fakamatala mei he kau taki na’e ‘ikai ha sofiuea ia pea ‘oku ‘i ai pe ‘a e polokalama ia ‘a e Potungāue ‘a ia ‘oku mahino mai ko e polokalama angamaheni pe ia ‘a e EQAP

Kapau leva koe Pule’anga ‘eni ‘oe kakai pea ‘oku poupou ki he ‘ata ki tu’a, pule lelei mo e tali ui ki he kakai pea ‘oku fiema’u ‘e he fonua kenau ‘ilo ki he hu’unga ‘enau pa’anga.

'Oki malie lahi 'a e temokalati 'oki malanga'i.