Fakanofo faka'ilonga Toketā Filōsefa 'o 'Olikoni Ta'ai 'Univēsiti Massey ^Featured

Ko ‘Olikoni Ta’ai foki koe matāpule ia mei he Fuakafa mei Te’ekiu pea na’e fakahoko foki ‘a ‘ene fakatotolo ki hono mata’itohi Toketā Filōsefa ‘i he ngaahi fakafe’atungia ‘oku fehangahangai koe kau ako tangata ‘i he ako ma’olunga ange ‘i Nu’usila (obstacles encountered by Tongan male learners in higher education in Aotearoa).

Ko e kātoanga hilifaki mata'itohi 'a e ‘Univēsiti ‘o Massey ‘i Palmerston North na'e kamata lele ia mei he 'aho 25 'o Nōvema 'a ia 'e toki ngata ki he 'aho 1 'o Tisema.

Ko Dr. Ta’ai foki na’a ne ako pe ‘i he Ako Ma’olunga ‘o Tonga pea na’a ne fai fatongia foki koe faiako he Ako Ma’olunga Liahona pehe ki he ‘Univēsiti ‘o e Pasifiki Tonga Va’a ‘i ‘Atele.

Ko hono fakanofo foki ko’eni ‘o Dr. Ta’ai ‘oku toe ‘alu hake ai ‘a e tokolahi ‘o e kau ma’u faka’ilonga Toketā Filōsefa ‘a Tonga ki ‘olunga. ‘I he taimi tatau ‘oku kei pukepuke ai pe ‘e Tonga ‘a e lekooti ‘i mamani ki he kau ma’u faka’ilonga Toketā Filōsefa ‘o fakatatau ki he tokolahi ‘o e kakai ‘o e fonua.

Na’e lava mai foki mei Tonga ‘a e ni’ihi ‘o e famili ‘o Dr. Ta’ai pehe ki hono famili moe kainga ‘oku nau nofo Nu’usila ki he kātoanga ni.

'Oku ma'u famili foki 'a Dr. Ta'ai kia Vaitoli Ta'ai 'o Tu'anuku mo Ha'ateiho moe fanau 'e toko ono.