Foaki tohi fakamo'oni Ako Polokalama Ako Faka-Tekinikale ‘a ‘Aositelēlia ma’áe Pasifikí (Australia-Pacific Technical College) ^Featured

Ko e ngaahi tohi fakamo’oni akó ni na’e foaki ia ‘i he ngaahi tafa’aki kehekehe ‘o e ako fakatekinikalé ‘o kau ai ‘a e tufungá, ko e talitali kakaí, ‘uhila, ‘enisinia, ko e teuteu mo e tāvalivalí, ngāue fakapalamá, mo e ngaahi tafa’aki kehe pē.

‘I he lea ‘a e fakaafe fakalangilangí, Claude Tupou na’á ne fakamālō’ia ai ‘a e Pule’anga ‘Aositelēliá ‘i he faingamālie ako ko ‘eni kuo nau foaki ma’áe fānau Tongá.

“’Oku mau hounga’ia ‘i he tokoni kuo fakahoko ‘e he Pule’anga ‘Aositelēliá, ‘i hono ‘omai ‘a e faingamālie ko ‘ení ke toe fakalakalaka ai ki mu’a ‘a e poto’i ngāue ‘a e tamaiki Tongá ‘o fakafou ‘i he Polokalama Ako Faka-tekinikale ‘a ‘Aositelēlia ma’áe Pasifikí.”

“Kuo hoko ‘a e ako ‘a e APTC ko ha founga ako ma’olunga ia ki he ni’ihi ‘oku nau ‘i he mala’e ‘o e ako faka-tekinikalé, pea ‘oku tokoni ia ki he ngaahi fiema’u ‘i he tafa’aki faka’ekonōmika ‘a e fonuá.”

Na’e kau fakataha foki ‘a e Pule Lahi ‘o e Potungāue Ako mo e Pule Lahi ‘a e APTC ‘i he Pasifikí Denise O’Brien ki hono foaki atu ‘a e ngaahi toko fakamo’oni akó ni.

Na’e fakahā ai ‘e Denise ‘oku fakataumu’a ‘a e polokalama akó ni ke tokoni’i e Pasifikí ki ha pōto’i ngāue ‘oku toe fakalakalakaangé pea na’a ne fakamonū’ia’i ai pē ‘a e lavame’a kuo fakahoko ‘e he fānaú.

“‘Oku ou fakatauange ‘e hoko ‘a e ako na’a mou fakahokó ke mou toe fakalakalaka ange ai mo ho’o mou ngaahi fāmilí, pea ke langa hake ai ho’omou mo’ui he taukei na’a mou ma’u.”

“Kuo mou hoko ko e fa’ifa’itaki’anga ki ho’o mou fānaù ‘i he akó, he ‘oku ‘ikai ke fakangatangata ia ‘o fakatatau ki he ta’u ‘oku mou ‘i aí.”

Ko e polokalamá ni na’e toki kamata ia ‘i he 2007 ‘o fakapa’anga ‘e he Pule’anga ‘Aositelēlia. ‘Oku ‘I ai foki mo e ngaahi ‘apiako ‘a e APTC ‘i he ngaahi fonua ‘e fā ‘i he Pasifikí ‘o kau ai ‘a Samoa, Papua New Guinea, Fisi pea mo Vanuatu.

Ko e ako ko ‘ení ‘oku māhina ‘e ono pea ‘oku malava ke ma’u ai ‘a e Certificate Level III ‘i he ngaahi tafa’aki kehekehe ‘o e ako fakatekinikalé.

‘Oku fengāue’aki ‘a e ATPC mo e Potungāue Akón ‘o fakafou ‘i he ‘Apiako Fokololo (Tonga Institute of Science and Technology) pea mo e ‘Apiako ‘Ahopanilolo.

Ko e toko 40 ko ‘ení ko e toko lahi ‘o kinautolu kuo nau ‘osi ma’u ngāue ‘i he ngaahi Potungāue ‘a e Pule’angá, fanga ki’i pisinisi taautahá, mo e ngaahi ngaue’anga ‘ikai fakapule’angá.

-MEIDECC