Polokalama fai fika ‘i he ngaahi Lautohi Pule’anga ‘i Tongatapú Featured
Fanau Lautohi Pule'anga
13 Siulai 2016. ‘Oku lolotonga fakahoko ‘e he Potungāue Akó ha polokalama fai fika ‘i he ngaahi Lautohi Pule’anga ‘i Tongatapú ni ki hono fakamālohia mo langa ‘a e taukei ‘a e ki’i tamasi’i mo e ta’ahine ako ‘i he fiká.
Na’e ‘i he ‘apiako Lautohi Nuku’alofá ai ‘aneuhu ha timi mei he Va’a Ma’u’anga Fakamatala ‘a e Potungāué ‘o faitā vitiō ‘a e fānaú lolotonga ‘a ‘enau fakahoko ‘a e fiká.
Na’e fakahā ai ‘e he Puleako ‘o e Lautohi Pule’anga Nuku’alofá, Tulikava Sete Mataele ‘e tokoni ‘a e polokalama ko ‘ení ki he kau faiakó kae pehee foki ki he fānau akó ‘i hono feinga ke a’usia ‘a e taumu’a ‘a e Potungāué.
“’I hono fakahoko ‘o e polokalama ko ‘eni ‘e malava ai ke tokoni ki he tamaiki akó pea mo e kau faiakó ‘i hono fokotu’utu’u ha fanga ki’i ‘ekitivitī te ne faka’ai’ai ‘a e fānaú ke nau manako ki hono fai ‘o e fiká.”
Ko e polokalama fika ko ‘ení ‘oku ma’áe levolo kotoa pē ‘o kamata meí he kalasi tahá ki he kalasi onó, ‘a ia na’e fili ai ‘e he GPS Nuku’alofa ia ‘a e kalasi uá ke fakahoko kiai ‘a e polokalamá.
Fakatatau ki he lau ‘a Tulikava ko e kaveingá ‘oku ‘osi ‘omai pē ia ‘e he Potungāué pea ‘oku hanga leva ‘e he Faiako ia ‘o e kalasi kuo fili’í ‘o palani’i ‘a e ngaahi lesoni fika ‘o fakatefito he kaveinga koiá.
“Ko e fo’i fakakaukau ‘o e polokalama ko ‘ení ke kau mai ‘a e tokotaha kotoa ‘i hono tokoni’i ‘a e fānaú ke fakahoko ‘a e fiká. Ko hono hulu vitioo ko ‘eni ‘a e fānau mo e kau faiakó ‘i hono fakahoko ‘o e fiká ‘e malava ke sio ai ‘a e mātu’á ‘i he TV pea to’o mei ai ‘a e ngaahi me’a ‘e lava ke ‘aonga ki he’enau fānau ‘o fakahoko ia ‘i ‘api.”
Na’e pehe foki ‘e Tulikava ‘oku fai feinga ‘a e kau faiakó ke faka’ai’ai ‘a e tamaikí ke nau manako ki hono fakahoko ‘o e fiká neongo ko e konga lahi ia ‘oku ‘ikai tenau sai’ia ‘i he fiká.
“Ko e tokolahi taha ia ‘o e fānau akó ‘oku nau sai’ia nautolu he literature pea ko e ki’i ni’ihi tokosi’i pē ia ‘oku sai’ia he fiká. ‘Oku makatu’unga pē ia he me’a ‘oku te sai’ia aí, he ko e taimi lahi ko e me’a pē ‘oku tau sai’ia aí koia pē te tau fakahoko lelei’i.”
“’Oku ‘i he tu’unga fakafiemālie pē ‘a e fiká ‘i Nuku’alofá ni ka ‘oku mau feinga ke ‘ohake ia ki ha tu’unga ‘oku toe lelei angé.” Ko ‘ene fakahā
Na’e hoko atu ‘a e ‘a’ahi ‘a e timí ki he GPS Havelú mo Hala’ovave pea ‘e hokohoko atu aipē ki he ngaahi Lautohi kehee ‘i he uike kaha’ú.
-Pule'anga Tonga
4 comments
-
Oku lolotonga faiako ‘a Chester he kalapu ‘i Morroco pea na’e ‘a’ahi mai ‘a Chester mo e Pule lahi e kalapu ke fekumi ki ha ngaahi taleniti fo’ou mei he Pasifiki ‘o kau ai ‘a Tonga'ni, Fisi mo Ha’amoa.
-
Fakatupu fifili lahi e tu'unga 'oe fo'i polokalama fika ni i he curriculum fika lolotonga. 'E lava ke fakama'ala'ala mai pe koe ha e kakunga e polokalama fika ni moe curriculum fika lolotonga 'ae Potungaue Ako? Is this an intervention? Research? New curriculum? What is it?
-
'Oku 'ikai ha me'a ia 'e kovi 'okapau he'ikai ke toe hoko e ngaahi polokalama taanaki atu ko ha fakamole makehe ki he Pule'anga he ko e hili mai ai pe he uma 'o e kakai.
Koau ia kou sai'ia au he lau veesi lauloto he 'oku 'ikai keu sio au koeha hano maumau. He oku talamai e he folofola 'ia Tesalonaika ketau lotu ta'e tuku. -
Kuoha e kau faiako ia he ngaahi kalasi kuo toe 'ai ai e fo'i timi faka'ai'ai makehe ia ko 'eni? 'Oku toe 'iai moe fo'i timi ako fika faka-Tokonaki (va'a mokofute) 'a Finau Tutone. Pea 'oku faka'au ke ki'i hokohoko e uiui tevolo 'a e Minisita Ako. Kuo ne 'osi tu'utu'uni ke 'ai moha veesi lauloto ke lau ma'uloto 'ehe fanauako he ngaahi 'apiako lautohi kotoa 'i Tongatapu ni. 'Ikai mu'a ke tuku pe me'a fakalaumalie ia ki he kau faiako lautohi fakasapate, he tau maiaa 'e fu'u mahu'inga fefee ki he fanau ako iiki. Kaikehe 'oku fa'a mole taimi 'o e Minisita he 'ai me'a fakakuonga mu'a, tokua ke hange tofu pe ko ia he taimi na'ane kei lautohi aii. 'Oku haa mahino mai heni, na'e ne fu'u matu'aki vaivai 'aupito he lesoni fika, talu mei he'ene kei lautohi, 'o a'u mai ai pe ki he taimi ni. Pea 'oku fa'a 'ilonga ia he taimi 'oku fa'a faifika palafu holo ai 'i Fale Alea.