Holoki e 'ā vahevahe: Katoa ‘a Tonga ‘o taha ^Featured

Kuo sīlongo ‘a e tapa kotoa ‘i he mo’ui pea faaitaha ‘a e Tonga ‘o poupou ki he Timi Mate Ma’a Tonga.

Ko e faka’ilonga ‘eni ‘oku kei Tonga pe ‘a Tonga pea toe mahino mo e loto’i Tonga ‘o hange koia ‘oku hā ‘i he’etau faa’i kavei koula ‘a e ‘ofa fonua mo e mamahi’i me’a.

Na’e fai e longoa’a ‘a e fonua ‘i he teu ‘o e fili Fale Alea pehe ki he lava kakato ‘a e fili pea koe me’a anga maheni pe ia ‘oku hoko pea tau’ataina ‘a e tokotaha kotoa ke ‘ohake ‘ene fakakaukau.

Kaikehe ‘oku fakaofo foki ‘a e sīlongo ‘a e mala’e ‘o e politiki pea katoa ‘a e Tonga kotoa ‘o taha ‘i he poupou ki he’etau fanau Mate Ma’a Tonga pea koe lanu totonu ia ‘o e Tonga pea ‘oku fakamafana lahi.

‘Oku toe fakamahino mai foki ‘e he Mate Ma’a Tonga ‘a e mahu’inga ‘o e sipoti he ‘oku malava kene fakatahataha’i ‘a e fonua.

‘Oku toe makehe ange foki ‘a Tonga ia mei he toenga ‘o mamani ‘i he founga ‘enau poupou mo e mateaki pea na’e talamahino ‘e he kau poupou ‘o e Mate Ma’a Tonga ‘a e kehe atu pe ‘a e fiefia mo e poupou ‘a e Tonga pea kuo fakamo’oni’i fakamamani lahi ‘eni pea ‘oku tau lakau’aki.

‘Oku kei hēhē’ia pe ‘a e fonua ‘o a’u mai ki he ‘aho ni ‘i he lava me’a ‘a e Mate Ma’a Tonga pea ‘oku ‘omai ‘e he Mate Ma’a Tonga ‘a e lesoni ke ako mei ai ‘a e fonua.

‘I he’ene pehe leva kapau koe sipoti ‘oku ne fakatahataha’i ‘a e fonua pea ‘oku totonu leva ke fakamu’omu’a ‘a e sipoti ‘i he ‘asenita ngāue ‘a e Pule’anga pehe ki he ngaahi kupu fekau’aki he kuo tau ‘osi sio mata mo fakamo’oni ki hono ivi.

Neongo ‘a e tō kehekehe faka-sōsiale, faka-politikale, faka-tukufakaholo mo faka’ikonomika ka na’e tu’u ‘a e Tonga kotoa ‘o tataki ‘e Ha’a Moehofo pehe ki he Palēmia mo e kau Takilotu mo e Tonga kotoa ‘o taha ‘i he fiefia mo poupou pea ko loto’i Tonga ia ‘oku tau faka’amu kiai.