Luva e tohi fo‘ou Tonga: Fonua ‘a Kainga, ke kau hono katoanga‘i e Hilifaki Kalauni Featured
Nuku'alofa, 3 Siulai 2015. ‘E luva atu he ‘aho ni ‘a e tohi fo‘ou ko e TONGA: Fonua ‘a Kainga, ko e fuofua tohi ‘i hono fa‘unga, ko ha fa‘u ‘e he ni ‘ihi ‘o e kau mataotaotaha ‘o e fonua ni ‘i honau takitaha mala‘e, ke kau ‘i he ma‘alali ‘o e Hilifaki Kalauni.
‘Oku taumu‘a foki e tohi ni ke tanumaki ki he fonua mo hono hakotupu ‘o e lolotonga mo e kaha’u, pea ke hoko ko e fakaivia ‘anga ‘o Tonga mo hono kakai.
‘Oku kau ‘i he ngaahi pasina laka he 200 ‘o e tohi ni, ha Talamu‘aki fatu ‘e Pilinisesi Siu‘ilikutapu (fuofua fefine ke Fakafofonga Fale Alea, Sea ‘o e Kosilioa Fakafonua ‘a e Hou‘eiki Fafine), mo ha ngaahi vahe ‘a e kau fa ‘u kehe kau ai ‘a ‘Eiki Nopele Tu‘ivakano (Fuofua Palemia Temokalati ‘a Tonga, Sea lolotonga ‘o e Fale Alea), Faiefekau Toketa Siotame Havea (Puleako ‘o e ‘Apiako Tohitapu Sia ‘a Toutai), Toketa ‘Ana Maui Taufe‘ulungaki (Minisita Ako Malolo, Faiako, mo e memipa tutuku ‘o e Komisoni Konisitutone mo Fili, Ms Lupeha’amoa ‘Ilaiu (Fale’I Makehe ‘a e ‘Ofisi Palemia), Lady ‘Eseta Fusitu’a (Sekelitali ‘a ‘Ene ‘Afio Tupou IV, fuofua fefine Sekelitali Lahi ki he Kapineti, pea mo e Minisita Malolo ki he Fakamatala mo e Fetu’utaki).
Ko e fuofua tohi ‘eni ‘i hono fa‘ahinga, ‘o fa’u ki ha kaveinga fakalukufua ‘o e fonua, pea ‘i he lea faka-Tonga. Na’e fa’u ‘a e tohi ni ‘e he tu’ukimu’a ‘i he mala’e ‘akatemika mo e kau taukei ‘i he ngaue’anga. ‘Oku vakai ‘a e tohi ki he ngaahi kaveinga tefito kae lahi hono ma’uhala, pea matu’aki pelepelengesi fekau’aki mo e ngaahi fa’unga ola ‘o e nofo ‘a Kainga, ‘a ia ‘oku ne fakakakano ‘a e fonua mo e pule’anga Tonga.
‘Oku siofi ‘e he tohi ni ‘a e ngaahi tefito‘i kaveinga kuo ne tataki ‘a e fonua ‘i he laka he ta’u ‘e taha afe ki he ‘aho ni, pea ne aofangatuku ‘a e tefito’i fakakaukau ‘o e Tonga mo e mateaki‘i fonua Tonga. ‘Oku ne faka’ilonga’i foki ‘a e ngaahi halafononga ‘a e ngaahi fa’unga Taki ‘o e fonua, mei he Tu‘i Tonga ki he Tu‘i Ha‘atakalaua, kae pehe ki he kuonga kimu‘a ‘o Ha‘a Ngata pea mo e tu‘uta ‘a e kau ‘Iulope.
‘Ikai ngata ai, ‘oku toe vakai‘i foki ‘a e ngaahi ta ‘u mohu faingata‘a ‘o Taufa‘ahau mo hono tanupou ‘o e pule ‘anga onopooni ‘o Tonga, ko e ngaahi ha’aha’a fakavaha’apule’anga na ‘e feia ‘e Siaosi Tupou II, ko e ngaahi fakalelei fakafonua ‘a Kuini Salote Tupou III, ko e ngaahi polokalama visone fakalakalaka tautefito ki he teke ‘o e Ako, ‘a Taufa‘ahau Tupou IV pea mo Tupou V, kae pehe ki he ngaahi pole fo’ou ‘o e kuonga hili e fakalelei faka-Konisitutone ‘o e La‘a kuo hopo Kingi Tupou VI.
Fakaikiiki, fetu’utaki:
Tevita Motulalo
+676 7752795
