'Alu ki Mu'a Ki he Kuohili, 'Alu ki Mui ki he Kaha'u ^Featured

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava’u Academy for Critical Inquiry and Applied Research [VACIAR] &
Tonga International Academy [TIA]

Na’a ku lave he ‘atikolo 12 ki he tala ‘a e ouau ‘o e kava mo e ‘atikolo 11 he tala ‘o e kava, ‘a ia na’e fakatou tufunga ‘e he fua tufungafonua ‘iloa ko Lo’au, ‘o fakahoa mo e tala fonu ‘o e lotu Kalisitiane, ‘a ia ‘oku humaki he tala masani ‘o e kolosi/‘akaufakalava ka e hunuki ‘a e tala mohu ‘o e fonua he tala fungani ‘o e kava. ‘Oku fetuukuaki ‘a e kona mo e melie, ‘o tomu’a kavahia/konahia ka e tomui melie’ia, ‘o hoko ko e fakanofonofo’anga ‘o e fonua mo e tala – ka e fehūaki ‘a e mate mo e mo’ui he nunu’a ‘o e angahala, ‘o tumutumu he mate ‘a Sīsū ko e mo’ui’anga mo e fakamolemole’anga ‘o e mate ta’engata ‘a e fa’ahinga ‘o e tangata – ka te u talanoa heni, he ‘atikolo 13, ki he fakakaukau mo fakangāue fakaTonga loloto atu mo mālie fau ko e: “‘alu kimu’a ki he kaha’u, ‘alu kimui ki he kuohili,” ‘a ia ‘oku ‘uhinga ko e: “tuku ‘a e kuohili ‘i mu’a, tuku ‘a e kaha’u ‘i mui.”

‘Oku fokotu’utu’u fakafelavai [pē circular] ‘e Tonga [mo e Moana/’Osenia/Pasifiki] ‘a e kuohili mo e kuongamu’a [‘a ia ‘oku toe ‘iloa ko e kuohoko mo e ‘aneafi], lolotonga/lotolotonga mo e kuongaloto [‘a ia ‘oku to e taku ko e hoko mo e ‘ahoni] mo e kaha’u mo e kuongamui [‘a ia ‘oku to e lau ko e kahoko mo e ‘apongipongi]. ‘Oku makatu’unga ‘eni he mo’oni ‘i natula, ‘o tatau ‘a e me’a kotoa pē, fakatoulōua ‘a e matelie mo e laumālie, tu’unga honau kehekehe, ‘a ia ‘oku ‘ikai ha me’a ‘e taha ‘e ma’olunga pē ma’olalo ha me’a ‘e taha, ‘o hangē ko e fakakaukau mo fakangāue fakaTonga ‘o e fonua, ‘o kamata he fā’ele [fonua 1], mo e mo’ui [fonua 2] pea faka’osi he mate [fonua 3].

‘Oku fakanofonofo fakakohi/fakalaini [pē linear] ‘e he Uēsite ‘a e kuohili [past], lolotonga/lotolotonga [present] mo e kaha’u [future], ‘a ia ‘oku mu’omu’a ma’u pē ‘a e kaha’u ‘i mu’a [front] mo e lolotonga/lotolotonga ma’u pē ‘i loto [middle] mo muimui atu ma’u pē ‘a e kuohili ‘i mui [back]. ‘Oku fehangahangai ‘eni mo e mo’oni ‘i natula, ‘o hangē ko e fakakaukau mo fakangāue faka’evalūsio ‘a e me’a kotoa pē, fakatoulōua ‘a e matelie mo e laumālie, ‘a ia ‘oku taku ‘oku ma’olalo pē ma’olalo ‘a e me’a ‘e taha he me’a ‘e taha. ‘Oku ‘asi ‘eni he fakakaukau mo fakangāue fakaUēsite ‘o e fakalakalaka faka’ikonōmika [economic development], ‘o lau ‘oku ma’olunga ‘a e ngaahi fonua Uēsite ka e ma’olalo ‘a e ngaahi fonua kehe mei he Uēsite.

Na’a ku fa’a lave he’eku ngaahi fua ‘atikolo kimu’a ki he me’angāue faka’aati/fakalitileli mahu’inga mo faka’ofo’ofa ko e heliaki, ‘a ia ko e lea ki ha me’a ‘e taha ka e ‘uhinga ia ki ha me’a ‘e taha, ‘o hangē ko e heliaki fakafetongiaki ko e “la’ātō”/”la’ā-kuo-ungafonua” ki he “mate” mo e “si’i hengihengi ē kuo ‘alu, kapakau ai si’ete manatu” ki he “mavahe ‘a e mo’ui mei he mate, mo e vaetu’ua ‘o e laumālie mei he matelie” mo e heliaki fakafekauaki ko e “kolosi ‘i Kalevale” ki a “Sīsū ko e faiako tālā mo e fakamo’ui ‘o Nasaleti” mo e “kulukona ‘o Tavakefai’ana” ki a “‘Ulukālala ko e ‘eiki lahi mo e to’a tete’e ‘o Tu’anuku.”
 
‘Oku makatu’unga ‘a e lea heliaki ko e: “‘alu kimu’a ki he kaha’u, ‘alu kimui ki he kuohili” [“walk forward into the past, walk backward into the future”] he lea ko e: “kuongamu’a” [“past”], ‘a ia ‘oku to e ‘uhinga ki he “kuohili, [kuohoko mo e ‘aneafi]” mo e “kuongamui” [“future”], ‘o to e tuhu ki he “kaha’u, [kahoko mo e ‘apongipongi]” – ‘a ia ‘oku ‘uhinga ia ko e: “tuku ‘a e kuohili ‘i mu’a, tuku ‘a e kaha’u ‘i mui” [“put the past before us, put the future behind us.” ‘Oku ‘uhinga ‘eni ki hono ‘ave ‘a e “kuohili” [pē “kuongamu’a”] ‘o tuku ‘i “mu’a” ‘iate kitautolu ko e tūhulu he “lotolotonga, [hoko pē ‘ahoni]” [pē “kuongaloto”] ka e ‘ave ‘a e “kaha’u” [pē “kuongamui”] ‘o tuku ‘i “mui” ‘iate kitautolu he lotolotonga, ‘o huluhulu’aki ‘a e “kuohili” [pē “kuongamu’a”].

‘Oku “fepaki” ‘a e “’alu kimu’a ki he kuohili, ‘alu kimui ki he kaha’u” mo e mo’oni/lōsiki, ‘o ‘uhinga he ‘ikai lava ke hoko ‘i natula [pē ‘oku paradoxical, metaphorical mo allegorical], ka e “fenāpasi” ‘a e “tuku ‘a e kuohili ‘i mu’a [‘iate kitautolu he lotolotonga], tuku ‘a e kaha’u ‘i mui [‘iate kitautolu he lotolotonga]” mo e mo’oni/lōsiki, ‘o malava ke hoko ‘i natula [pē ‘oku spatiotemporal, historical mo logical]. ‘Oku tatau tofu ‘eni mo e to’onga ‘a e fakakaukau mo fakangāue fakaTonga ko e heliaki ko ha me’angāue faka’aati/fakalitileli, ‘a ia ko e lea ki ha me’a ‘e taha ‘oku “fepaki” mo e mo’oni/lōsiki ‘i natula ka e ‘uhinga ia ki ha me’a ‘e taha ‘oku “fenāpasi” mo e mo’oni/lōsiki ‘i natula.

‘Oku ‘i ai ‘a e felāve’i tonu heni ‘a e fakakaukau mo fakangāue fakaTonga hono fokotu’utu’u fakafelavai [pē circular] ‘a e “kaha’u/kuongamui”, “lotolotonga/kuongaloto” mo e “kuohili/kuongamu’a” mo e fakakaukau mo fakangāue fakaTonga ‘o e taumulivale mo e taumu’avale, ‘a ia ko e puli/ta’e’ilo ‘a e taulanga ‘oku folau mei ai mo ia ‘oku folau ki ai ‘a e vaka, ‘o fakaola he vakahē mo e folauhē mo fakaiku ki he folaumole mo e folaumate – ‘a ia ‘oku fehangahangai mo e to e fakakaukau mo fakangāue fakaTonga ‘o e taumulitonu mo e taumu’atonu, ‘a ia ko e ‘asi/’ilo ‘a e taulanga ‘oku folau mei ai mo ia ‘oku folau ki ai ‘a e vaka, ‘o fakaola he vakahao mo e folauhao mo fakaiku ki he folauma’u mo e folaumo’ui.

‘Oku hoko ‘a e taumulivale mo e taumu’avale, vakahē mo e folauhē, mo e folaumole mo e folaumate ko e ‘ikai ‘ave ‘a e ‘ilo mo e poto ‘o e “kuohili” [pē “kuongamu’a”] ‘o tuku ‘i “mu’a” ko e tūhulu he “lotolotonga” [pē “kuongaloto”] mo e ‘omai ‘a e “kaha’u” [pē “kuongamui”] ‘o tuku ‘i “mui” mo huluhulu’aki ‘a e ‘ilo mo e poto ‘o e “kuohili” [pē “kuongamu’a”] – mo e taumulitonu mo e taumu’atonu, vakahao mo e folauhao, mo e folauma’u mo e folaumo’ui hono ‘ave ‘a e ‘ilo mo e poto ‘o e “kuohili” [pē “kuongamu’a”] ‘o tuku ‘i “mu’a” ko e tūhulu he “lotolotonga” [pē “kuongaloto”] mo ‘omai ‘a e “kaha’u” [pē “kuongamui”] ‘o tuku ‘i “mui” mo huluhulu’aki ‘a e ‘ilo mo e poto ‘o e “kuohili” [pē “kuongamu’a”].

‘Oku hoko ‘a e ngaahi fakakaukau mo fakangāue fakaTonga tupu’a/tu’ufonua mohu mo fonu he ‘ilo mo e poto ko ‘eni ko e akonaki/mōlolo mā’uhinga atu mo ‘aonga fau ki he me’a kotoa pē, ‘o tatau ‘a e pule’anga, temokalati, fakalakalaka faka’ikonōmika, lotu, ‘aati mo e ako. ‘Oku ‘i ai ‘a e talanoa mālie ki he toutai ‘iloa ko Pahulu ‘i Ha’afeva, Lulunga, Ha’apai, ‘a ia na’a ne fale’i ‘a e vakalā na’e teu folau ki Tongatapu ke toloi he ‘e kovi ‘a e mātangi mo e tahi, ‘o tefito he’ene ‘ilo, poto mo e taukei fakatoutaivaka fekau’aki mo e tu’u ‘a e matangi, holo ‘a e ‘ao, pā ‘a e peau mo e tafe ‘a e matamata‘au mo e hā fua. Na’a ne hifo atu ki fanga ‘i taulanga he pongipongi hoko ‘o toki ‘ilo ai tā kuo fesi hono fanā, mahaehae ‘a e lā mo maumau hono konga, pea na’a ne lea tonu ki he kau folau ‘o pehē, “Ko e tala atu ‘e he puaka na’e fuanifo ke mou nofo ka e taukave.”

Ta u toki hoko atu.