Munomuna Mei Faleha'akili ^Featured

Na’e pa e sika mei Ha’amoa
Laangaa pea fohu’a he koka
‘O fofonga tolu tu’u ‘i Pangai
Tapa ko Tangita ko ia e Mafi
Ne liua e kava ‘o tuku ki ai
He na’e mamafa ‘ene povai
Pea ne ne langa ha fale ‘e fa
Fale Ha’akili mo Ha’angata
Faleolo pea mo Fokololo
Pea ne paasi ‘enau Lao
Pea tuku ia ‘i Fokololo
Ke tauhi’aki ‘enau nofo

Pea fokotu’u mo e pangai ‘e fa
Ko e molumalu hono fonua
Tukufakaholo honau kava
Le’o Ha’angata ‘i he tou’a
Fale Ha’akili he tafatafa
Ko Fokololo he to’ohema
Pea pa e Sika mei ‘Utulau
Lave he koka pea laukau
Pea faiteunga ai pea ‘alu
‘O auto ‘i Kolongahau
Ne Suipi ‘i ‘Alokiha’afata
Matakaiua ope matafala
Tu’i Tonga pea alaimoana

Pea toe laangaa e sika
‘O ‘alu ‘o lave ‘i Ha’angana
Ne nau ha’ele pea toofaa
Ne fakamo’oni he Tu’i II
Toe pa e sika ko e ‘ulutoa
‘O too he fale ‘o Tupouto’a
Ko e kumi ki ha Hau ‘e tolonga
He ko e me’a tala mei fuoloa
‘E ai ha ‘aho te na po Tonga
‘A Kanokupolu mo e Tu’i Tonga
‘Oku ha ia hotau kuonga
‘Io ‘a e kuonga III mo e IV
‘A e kuonga V mo e Lolotonga

Ko e Tonga fe kei tala’a
Tau fiefia he’e ta mamata
Kei malu si’i ngoue kakala
Ko e teuteu hota Pule’anga
Ko si’i papai ‘o Moheofo
si’i tekiteki ‘o Ha’a Vaea
Pea ko e sei ‘o Ha’a Ma’afu
Ko e kalokati ‘o Lo’amanu
Taukei ‘o Langi tu’o teau
Pea ko e taiseni ‘o Ha’a Havea
Ko e Lupe ‘o Falealea
Si’i Ekiaki ‘o Takalaua

Maluamata pea holo ho’o nofo
Kau fakalele lupe pea fakatotolo
Ne talu hono ui ‘o Ha’a Moheofo
Ke angi he fonua te’eki ke ta ngoto
‘Ofa he Lupe ni mo si’ene puna
Mo si’ene taukapa he fonua
Tala pea ngana ko hono tu’unga
Ke ne ‘o’ofaki e fonua
Ka ‘oku ‘ikai si’i ke hounga
Vakai ki mui vakai ki mu’a
Ko fee tupu mei he ‘Otua?
Ko Ha’a Moheofo e Pule Fonua

Te u tukuange si’eku Lupe
Ke siu mo ala he ‘aho ko’ee
Ke mahino ki he taha mo e ua
Pea ‘ilo ‘e he sola mo e ‘uta
Mo e to’utupu hotau fonua
Ko si’i Lupe ni lupe ‘o Mo’unga
Ne hifo ‘o ala ‘i Takalaua
Hono kapa’anga ko Fonuamotu
 Pea kuo hifo ‘i Kanokupolu
Lao mo e Lotu ko ‘ene mafua
‘Oku fakaha ia ‘e he Fuka

Ta fakamo’oni he talanoa ni
‘O ka ha’ofanga ‘a ‘uta mo tahi
Tuifio mai mo papalangi
‘E fana ‘a ‘uta ‘e fana ‘a tahi
Holo mo e ‘iunioni siaki
Kae kapa pe Lupe ‘i he topumasi
Kae kai ai pe manu vaivai
'I he fangota ‘a e Lulutai