Pisinisi Mo e Kalatua ^Featured

1. Kuo movete ‘i he kolopé
‘A e ngaahi tui ‘o ‘Iulopé
Afuhia ai ē ‘Otu Felenité
‘O fele he me‘a fai vevelé
Hake‘uta me‘a fakatauelé

2. Ko ‘ena ha tuinga sisitemi
He ‘ikonōmika fio politiki
Kominusi ē mo e ‘olikakí
Fāsisi ha pule fakamālohí
Kepitalisi mo e temokalatí

3. Ko e pisinisi mo e kalatua
He tākanga ka kuo fesītu‘á
‘Itiolosia ‘ena ‘a e tautahá
Ka e teoli ē ‘o e lukufuá
Toki vete ‘e he tā mo e vā

4. Fakamamanilahi ē kuongá
Pule ‘a e poto mo e koloá
Tumutumu he ‘Ī-Tekinolosiá
Kavaneni hono tama‘imatá
Kalatua lahi ka e mamani tahá

Tau.

Ka ko e hā nai ha‘au laú?
Fai pē ā ha‘o fakamaau
‘E ma‘u pē he feilaulaú
Ka kumi ē potupotutataú
Talaatu ha fonua malú

BUSINESS AND CULTURE

Poetry and transaltion by Professor Hūfanga Dr ‘Ōkusitino Māhina
Music by Kōmani Kamitoni

1. Diffused throughout the globe
Are the many beliefs of Europe
Sprinkling over the Friendly Isles
Scattering yet uncompromising
Overflowing yet tempting

2. There is a string of systems
Of economics mixed with politics
Of communism with oligarchy
Of fascism a rule of tyranny
Of capitalism with democracy

3. Business and culture
They co-exist yet oppose
One, the ideology of individualism
The other, a theory of collectivism
Resolved only by time and space

4. Globalised is the aeon
Reign of skill and wealth
I-Technology at the apex
Governance as its essence
Many cultures yet one world

Chorus.

But, what is your say?
Make your own judgement
Acquired only via sacrifice
Should you seek harmony
It‘s in the land of peace

KO E KI‘I FAKAMATALA NOUNOU

‘Oku talanoa ‘a e ta‘anga tala fakatukufakaholo/tala fakahisitōlia ko e: “Pisinisi mo e Kalatua,” ‘a ia ‘oku liliu mei he lea Tonga ki he lea ‘Ingilisi ko e: “Business and Culture” ki he fehangahangai [opposition] he funga ‘o e fakafelavai [intersection] pē fakahoko [connection] mo e fakamavahe [separation], he vaha‘a ‘o e pisinisi [business] fakaUēsite mo e kalatua [culture] fakaTonga, ‘a ia ‘oku humaki ‘a e pisinisi he temokalati [democracy] mo e kepitalisi [capitalism] fakaUēsite ka e ‘uhinga ‘a e kalatua [culture] ki he fonua mo e tala fakaTonga, ‘o fa‘oaki ‘a e ‘ilo mo e poto tupu‘a he fonua/kalatua [culture] mo fakafetu‘utaki he tala/lea [language] ko e ongo me‘angāue.

‘Oku ngāue‘aki he ta‘anga ha ngaahi lea Tonga ohi mei he lea ‘Ingilisi ‘e 17, ‘o hoko ko e heliaki fakafetongiaki mo e heliaki fakafekauaki ki he fehangahangai pē felalavai, fakahoko mo e fakamavahe, ‘a e pisinisi mo e kalatua , ‘a ia ‘oku ne fakatupulaki, fakalahi mo fakakoloa ‘a e lea Tonga, ‘o hangē ko e: kolope [globe], ‘Iulope [Europe], Felenite [Friendly (Isles)], sisitemi [system], ‘ikonōmika [economics], politiki [politics], kominusi [communism], ‘olikaki [oligarchy], fāsisi [fascism], kepitalisi [capitalism], temokalati [democracy], pisinisi [business], kalatua [culture], ‘itiolosia [ideology], teoli [theory], ‘I-Tekinolosia [I-Technology] mo e kavaneni [governance].

‘Ofa mo‘oni mo e manatu vivili.

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]