Lose 'o Hesipeletesi ^Featured

1. Si’i Lose matala ‘o Hesipeletesi
Kakala manongi ‘o ‘eni taimi
‘Uta‘anga ia ‘o e Mo’ui ni
Ne toka kiai si’ete fifili

2. Semitoni pe hoku ‘ofa’anga
Koe moto ‘o ‘eku ngoue kakala
‘Io he ‘ofa ni koe mate’anga
Ko hoku Kie Lamataki kihe tanu’anga

3. Tafi Tonga ‘a e Langi pea ake noa
‘A si’eku ‘ofa ni ki si’o fofonga
‘Imisi ‘o e manatu ‘ene ta’e manonga
Ifo ‘a Hetesi pea mo fa’itoka

4. Nifi e ha’aha’a neu nofo ‘o tatali
He koe matangi na ‘oku feangi’aki
'A si’oku loto ni ‘oku kei ‘alovili
He ko hoku ngalu tuku koe ‘i taimi

Tau

‘Ofa kuo fotu ‘i ho Fofonga
Ko ia pe si’eku koloa
Pea ka hili leva ‘ae nofo ko’eni
Ko ‘eku ‘ofani ‘e ta’e veteki

Fakamatala Nounou

Ko hiva kakala 'eni koe fa'u 'e Maile Tonga 'i he ma'u 'a e kolomu ni ki he sivi hiva 'a e ZCO 'i he ta'u 1962. 'Oku 'i ai pe 'a e tala na'e hiva'i 'a e hiva ko'eni 'e he Kalapu Maiange 'o Kolofo'ou ka 'oku 'ata pe 'a e fanga ke fakatonutonu mai.

'Oku mahino foki koe Hesipeletesi koe 'uhinga e ia ki he Heperides 'a ia ko e ngaahi 'otua 'o e efiafi (evening) mo e huelo koula 'o e too 'a e la'aa 'i he fananga (mythology) 'a e kau Kalisi pea 'oku toe ha pe foki 'i he fananga ko'eni 'a e ngoue 'i Hesipeletesi 'oku 'i ai 'a e 'apele 'oku fua koula tokua mo e ngaahi 'ulu'i talaakoni 'oku lauteau pea 'oku 'ikai kenau toe mamohe.

'Oku malie hono to'o mai 'e he punake 'a e lea Hesipeletesi ko e hingoa ia 'o e ta'anga pe maau ko'eni pea ko e heliaki tefito ia 'o ta'anga ko'eni pea ko hono ngaahi naunau koe 'ofa 'a ia 'oku ha sino pe mei he veesi uluaki ki he'ene 'osi pea ngalutuku'aki 'i he tau.

'Oku fakataipe 'a e 'ofa ki he lose 'i he ngoue 'i Hesipeletesi pea 'oku 'ikai ke toe lava 'o veteki 'o a'u ki hetesi.

'Oku fakaafe'i 'e he kolomu ha tanaki mai ki hono pukepuke mo fakatolonga 'etau ngaahi ta'anga mo hono ngaahi faka'uhinga pehe ki hono puipuitu'a.