Pōkarekare Ana [Hiva FakaMauli] Featured
![Pōkarekare Ana [Hiva FakaMauli]](/media/k2/items/cache/144aba6c568fde2fce1a77afef2ebf5c_XL.jpg)
PŌKAREKARE ANA [Hiva FakaMauli]
Fatu ‘e he pulotu fa‘u / punake ta‘e‘iloa
1. Pōkarekare ana,
ngā wai o Rotorua
Whiti atu koe hine,
marino ana e
2. Tuhituhi taku reta,
tuku atu taku rīngi
Kia kite tō iwi,
raru raru ana e
3. Whati whati taku pene,
ka pau aku pepa
Ko taku aroha,
mau tonu ana e
4. E kore te aroha,
e maroke i te rā
Mākūkū tonu i,
aku roimata e
Tau:
E hine e,
hoki mai ra
Ka mate ahau
I te aroha e
STORMY SEAS [PŌKAREKARE ANA – Hiva FakaMauli / Maori Song]
Fatu ‘e he pulotu fa‘u / punake ta‘e‘iloa & liliu mei he lea Mauli ki he lea ‘Ingilisi ‘e Māhinarangi Marama He TāVā Dr Helen Erana Ferris-Leary
1. Stormy are the waters
Of restless Rotorua
If you cross them Hine
They will be calmed
2. I write you my letter
I sent you my ring
So your people can see
How troubled I am
3. My pen is shattered
I have no paper
But my love
Is still steadfast
4. My love will never
Be dried by the sun
It will be forever moistened
By my tears
Chorus:
Oh Hine
Come back to me
I could die
Of love for you
VAI HOUFONUA [PŌKAREKARE ANA / STORMY WATERS – Hiva FakaMauli]
Fatu ‘e he pulotu fa‘u / punake ta‘e‘iloa & liliu mei he lea ‘Ingilisi ki he lea Tonga ‘e Palōfesa Hūfanga Dr ‘Ōkusitino Māhina
1. Vai ‘ene houfonuá
Lokatu‘u ‘a Lotoluá
Ta‘ahine ka folauá
Talu ai ‘ene nongá
2. ‘Oku tohi ‘eku ‘ofá
Ne ‘oatu hoku mamá
Ke mamata ho kāingá
Nofo ‘ene ta‘emanongá
3. ‘Eku peni kuo mahá
‘Oku hala ‘i he pepá
Ka ko ‘eku ‘ofá
Tapu ke to e veteá
4. ‘E tapuhā ‘eku ‘ofá
Ke pakukā he la‘ā
Ka ‘e hauhau ta‘engatá
Afuhi ‘e hoku lo‘imatá
Tau:
‘Alā si‘i ta‘ahiné
Ke ke foki mai pē
Ko au ni te u maté
He ‘ofa atu ki a koé
KO E KI‘I FAKAMATALA NOUNOU
‘Oku ou lau monū mo lau koloa ko ‘ete ‘inasi tu‘unga‘a he ta‘anga hiva kakala fakaMauli mohu ‘a e pulotu fa‘u / punake Mauli ta‘e‘iloa na‘a ne fatu ‘a e “Pōkarekare Ana”. Neongo ‘ene ngali faingofua mo ma‘ama‘a ‘a e lea ka matu‘aki ‘oku faingata‘a, mamafa mo fihi ‘a e ‘uhinga. ‘Oku tupu mei he‘ene fonu ‘i he tatau mo e potupotutatau mo tumutumu he mālie mo faka‘ofo‘ofa, ‘o ma‘una he loto ‘a e māfana mo mapuna he ‘atamai ‘a e fiefia.
‘Oku ngāue‘aki lahi mo lelei ‘e he pulotu fa‘u / punake ‘a e heliaki fakafetongiaki, ‘o hangē ko e hoko ‘a e hoihoifua hono ‘ofa‘anga ko ha lolo ‘oku lingi ki ha vai ‘oku lokatau ka e nonga [kupu / veesi 1] mo ‘ene luva ‘ene me‘a kotoa ka e kehe pē ke ne ma‘u ha nonga mo e fiemālie [veesi / kupu 2] – pea neongo ‘ene masiva ka he ‘ikai lava ha taha ‘o fakamāvae ia mo ‘ene ‘ofa [kupu / veesi 3], ‘o a‘u ki he‘ene lavanoa ‘o inumia ‘a lo‘imata [kupu / veesi 4] mo talia ‘a mate ki fa‘itoka [tau / kōlesi].
Na‘e liliu ‘e Māhinarangi Marama He TāVā Dr Helen Erana Ferris-Leary ‘a e “Pōkarekare Ana” mei he lea Mauli ki he lea ‘Ingilisi ko e “Stormy Waters” pea liliu ‘e Palōfesa Hūfanga Dr ‘Ōkusitino Māhina mei he lea ‘Ingilisi ki he lea Tonga ko e “Vai Houfonua.” ‘Oku faingata‘a fau ke liliu ha lea / tala ‘e taha ki ha lea / tala ‘e taha he ‘oku kehe ‘a e lea / tala ko ē mei hē, ‘o hangē pē ko e faingata‘a ke liliu ha fonua / kalatua ‘e taha ki ha fonua / kalatua ‘e taha he ‘uhinga ‘oku kehe ē mei hē.
‘Oku fa‘oaki ‘a e ‘ilo, poto mo e ‘uhinga he fonua / kalatua pea fakafetu‘utaki he lea / tala. ‘Oku fakafenāpasi ‘a e fepaki he fuo, uho mo e ‘uhinga he vaha‘a ‘o ha ongo lea / tala hono liliu ha lea / tala ‘e taha ki ha lea / tala ‘e taha – ‘o hangē pē ko hono fakafenāpasi ‘a e fepaki he fuo, uho mo e ‘uhinga he vaha‘a ha ongo fonua / kalatua hono liliu ha fonua / kalatua ‘e taha ki ha fonua / kalatua ‘e taha – ‘a ia ko ‘ene si‘i ange ‘a e fepaki ko ‘ene lelei ange ia ‘a e liliu.
Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]
3 comments
-
Ta'ahine 'a mai, pea 'a mai kau tangata na'a maha 'eku peni pea 'ikai ke ke to e ma'u ha tohi ke ke 'ilo ai 'oku ou tokanga atu. Mahina 'oku 'iai 'e lea Tonga 'oku pe he taau pe lei mo e tofua'a. Ko e mo'oni lahi ho'o lave 'e kei kehekehe pe 'etau fakatonga ki he fakapalangi kuo'omi. Mahina ka kuo hoko ho'o fakamaama koha makafakinanga ki he faofao kuotau fai ke toe manakoa ange hotau pola. Pea tuku mai he kei 'a 'a e kau tama. To'ua ki'i holoki pe ho'o malimali he 'oku teu Sapate Tamai. Mahina neu meimei nofo au ha faka'uhinga fakapunake fakapo'uli. He kuo 'alu foki e 'ofa'anga ia ka kuo mafoafoa 'eku peni he fie tohi kae pango kuo 'alu lau'i pepa ia. Pea 'ikai ha me'a hono fai ke fakamahino ki he 'ofa'anga teu kei tali atu pe. Fiki mai a si'eku ki'i laipepa teu kei tali atu pe ke fai ha ki'i tohi. 'Oku ou faka'apa'apa lahi atu ki he to'ua kae 'ataa pe mu'a keu tuku atu pe anga si'ete ki'i fakaofiofi ni na'a ne to e limai hatau kahoa ketau Sapate tamai 'aki.
Malo -
![Okusitino Mahina [Hufanga]](https://secure.gravatar.com/avatar/3faef0c7fca480e4d3fd4ffffa7a37c4?s=48&default=https%3A%2F%2Fmail.nepituno.to%2Fcomponents%2Fcom_k2%2Fimages%2Fplaceholder%2Fuser.png)
Si'oto'ofa Talamatangi:
'Oku malie lahi 'a e fifili mo e tanaki masani kuo fai pea 'oku ou fakamalo atu ai. 'Oku fakamo'oni tonu fau ho'o fifili mo e tanaki ki he'eku fakamatala / komeni nounou fekau'aki mo e ta'anga hiva kakala mohu ni, 'o tautefito ki he liliu lea, 'a ia na'a ku taukave 'a e 'uhinga 'oku faingata'a fau ke liliu ha lea / tala / language [mo e fonua / culture] ki he taha, 'o 'uhinga 'oku kehe 'a e fuo, uho mo e 'uhinga 'o e ngaahi lea [mo e fonua] takitaha. 'Oku 'asi lelei 'eni hono liliu 'a e lea [mo e fonua] Mauli ki he lea [mo e fonua] 'Ingilisi ki he lea [mo e fonua] Tonga, 'o hange tofu pe ko e ngaahi faingata'a ko ia kuo ke he'aki mo talaki.
'Oku ou fie fakamahino heni ko hono "tatau mo'oni" [true / original copy] 'o e fo'i ta'anga hiva kakala fakaMauli 'a ia 'oku taha pe mo 'iloa ko e: "Pokarekare Ana" he lea Mauli KA ko hono liliu ko e: "Stormy Waters" he lea 'Ingilisi mo e: "Vai Houfonua" he lea Tonga ko e "fakaofiofi" pe KA E 'ikai ko e "tatau tofu" pe. 'Oku to e hange tofu pe ko 'ene tu'u honau hingoa takitaha he lea Mauli, lea 'Ingilisi mo e lea Tonga ko e: "Pokarekare Ana," "Stormy Waters" mo e "Vai Houfonua" -- pea 'ikai ko ia pe ka e to e ha mahino hono liliu 'a e "Whati whati taku pene," "My pen is shattered" mo e "'Eku peni kuo maha" he kohi / laini 1, kohi / kupu 3, mei he lea fakaMauli ki he lea faka'Ingilisi ki he lea fakaTonga.
'E to e 'asi lelei 'eni 'o kapau te ke liliu 'a e "Pokarekare Ana" mei he lea 'Ingilisi ko e "Stormy Waters" ki he lea Tonga, 'a ia 'oku ou fakapapau'i he 'ikai tatau mo 'eku liliu fakaTonga ko e "Vai Houfonua," 'o hoko 'a e kehekehe 'eta liliu fakaTonga fakatouloua ko e "fakaofiofi" pe ki hono "tatau mo'oni" he lea Mauli ko e "Pokarekare Ana."
Fakatokanga'i ange na'e liliu 'a e lea faka'Ingilisi ko e: "My pen is shattered" ki he lea fakaTonga ko e: "'Eku peni kuo maha" [kohi 1, kupui 3] ke mita hono silapa 'o e kohi 1-4, kupu 3, 'a ia 'oku faka'osi "a" kotoa 'a e ngaahi kohi mo e kupu kotoa, 'a ia he 'ikai faka'osi tatau mo e ngaahi lea kuo ke fokotu'u mai ko e: havehave, momo mo e moefeefe ka e tukukehe pe 'a e lea ko e: mafoafoa. 'Oku 'ikai kainga ha peni 'oku maumau ["shattered" pen] mo e havehave, momo, mafoafoa mo e moefeefe -- 'a ia 'oku ofi ia he maumau 'a ha hina -- KA 'oku kainga ange ia mo e maha, mafahi mo e motu 'a ha peni. Neongo 'e mafahi mo motu ha peni 'e ke i lavanoa pe 'o fai'aki ha tohi 'a e vaitohi [ink], 'o tukukehe ka maha [empty] 'a e vaitohi he 'ikai to e lava ha tohi ha me'a, pea ko 'ene toki "shattered" mo'oni taha ia.
A shattered pen can also be an empty pen and, by the same token, a broken pen ...
'Ofa mo'oni mo e manatu vivili,
Hufanga -
Tulou atu ki he ma'u'anga tala ko 'eni. Ko e ki'i me'a si'i pe 'oku ou fifili kiai fakapunake. Ko fo'i liliu ko 'eni fekau'aki my pen is shattered. Ki he 'Eku peni kuo maha pe 'i he fakamauli Whati whati taku peni. Ko e tafe 'a e talanoa ia he'i kai keu tui ke ngaue'aki maha e peni ki he talanoa 'ofa ko 'eni. 'I ki'i meimei ofi ange kapau 'e pehe kuo ngalulu 'eku peni he 'oku hala mo e pepa. 'Oku lahi fau moe ngaahi lea tonga ke faka'ata mai 'aki e loloto 'a e vakai 'a e punake 'o kau ai e lea ko e havehave, momo, mafofoa , moefeefe mo e ngaahi lea lahi. Ko e maha 'oku mahino mai na'e ta'e mateuteu ka ko e ngaahi lea 'oku fokotu'uatu ne fai pe e tokanga ia ki he 'ofa ka ne fakafokifa pe 'ene mafofoa, mo 'ene moefeefe. Pea 'e lava pe ke toe loloto atu e faka'uhinga ke ki'i ngalulu pe tete 'eku peni me'a panga pe ne hala ia he pepa.
Malo