“‘Ikai keu ‘ilo pe ‘oku ou kei Minisitā pe ‘Ikai”: ‘Etuate Lavulavu Featured
Neiafu, 5 Tisema 2015. ‘Oku lolotonga lele foki ‘a e hopo ‘i he vaha’a ‘o Viliami Uasike Latu mo ‘Etuate Sungalu Lavulavu ‘i he Fakamaau’anga ‘i Neiafu. Ko e hopo foki ‘eni fekau’aki mo hono tukuaki’i ‘o Lavulavu ki he totongi fakafūfū mo hono maumau’i ‘o e Lao Fili Fale Alea lolotonga ‘o e Kemipeini Fili Fale Alea 2014.
Na’e fakahoko foki ‘i he ‘aho Falaite ko hono 4 ‘o ‘Okatopa ‘a hono fakafehu’i fakafihi (cross examination) ‘e he loea ‘a Viliami Uasike Latu, William Clive Edwards ‘a Lavulavu fekau’aki mo ‘ene fakamatala fakamo’oni ‘i he hopo ni. Na’e kamata ‘aki foki ‘e Edwards ‘ene fakafehu’i ‘a ‘ene ‘eke kia Lavulavu pe ko e ha hono tu’unga fakaako.
Na’e tali foki ‘e Lavulavu na’a ne ako pe he kolisi Sainehā ‘i Vava’u pea ne lava’i lelei ai ‘a e Sivi Folau Ki Muli. Na’e fehu’i foki ‘e Edwards kia Lavulavu pe koe ‘uhinga ki he ha ‘a e sivi folau ki muli pea tali ‘e Lavulavu koe sivi hū ki he ‘Univesiti. Na’e hoko atu ‘a Edwards ‘o fehu’i pe koe fē ‘Univesiti na’e ako ai pea na'e tali ‘e Lavulavu ko e ‘Univesiti BYU ‘i Hawaii.
Na’e fehu’i foki ‘e Edwards kia Lavulavu pe na’e toe hoko atu ‘ene ako ki ha ‘Univesiti pea tali ‘e Lavulavu ‘io na’e toe hoko atu ki Provo ‘i Utah ‘i he fonualahi ‘i ‘Amelika. Na’e toe fehu’i kiai pe na’e ma’u hano MA pea tali ‘e Lavulavu ‘ikai. Na’e fehu’i foki pe koe ha hono tu’unga fakaako (qualification) na’e ma’u pea fakaha ‘e Lavulavu koe mata’itohi pe mei he ‘Univesiti. Na'e toutou fehu'i pe koe ha 'a e mata'itohi ka na'e tali pe 'e Lavulavu koe mata'itohi mei he 'Univesiti. Na’e ‘iku foki ‘o fakahā ‘e Lavulavu ko e mata’itohi koe BA he education mei he BYU.
Na’e toe fakafehu’i foki ‘e Edwards pe na’e toe ‘i ai hano mata’itohi ma’olunga ange pea tali ‘e Lavulavu kiai ‘ikai. Na’e ‘eke foki ‘e Edwards pe na’e fakanofo ia koha Palofesa pea tali ‘ikai kiai ‘a Lavulavu. Na'e toe fehu'i pe na'e ma'u hano mata'itohi Toketa ka na'e tali 'e Lavulavu 'ikai.
Na’e fehu’i foki ‘e Edwards pe ‘e malava pe kene pehe koe tangata taukei ia mo poto he na’e kau ki he kau fale’i ‘o e Kovana ‘o Utah pea tali ‘e Lavulavu ‘ikai ‘oku vale pe ia. Na’e fakaha foki ‘e Edwards pea koe ha na’e kau ai ki he kau fale’i ‘a e Kovana Utah kapau ‘oku vale?. Na’e tali foki ‘e Lavulavu na’e fili pe ia ke kau kiai.
Na’e hoko atu ‘a e fakafehu’i ‘a Edwards kia Lavulavu ‘o fehu’i pe koe Minisita ia ‘i he Pule’anga pea fakaha ‘e Lavulavu ‘oku ‘ikai kene ‘ilo ‘e ia pe ‘oku kei Minisita pe ‘ikai.
‘Oku ‘amanaki faka’osi ‘a e hopo ko’eni ‘i he ‘aho Tusite 8 ‘o Tisema 2015 pea ‘oku ‘amanaki ke kakato ai pe ‘i he uike kaha’u.
12 comments
-
'Aukolo e kakai ki he Laughing Samoans kenau ki'i kata, ka ko e ho'ataani, oli lahi ange article ko'eni he drama a e Laughing Samoans. Kuo totu'a e loi 'a e tama 'etifaiva pea kuo 'ikai ke ne kei manatu'i pe ko fe fo'i talanoa mo'oni mei he loi. Ka kou tui pe kuo mei The End the faiva eee! teka faliki he kataaaa
-
Ka ko e fe leva e palofesa ia mo e toketa ne katoanga'i 'i Leimatu'a.hhhhhh Malie eeeee