Malava Ke Mole Sea Mateni Tapueluelu ‘Oka Fakamo’oni’i Faka Fakamaau’anga Na’e ‘I ai Hano Mo’ua ^Featured

‘Oku kau heni ‘a e tatali ‘a e kakai ‘oku nau muimui’i ‘a e tu’unga fakalao ‘a hono tukuaki’i na’e ‘i ai ‘a e mo’ua Fakamaau’anga ‘o e Fakafofonga Fika 4 Tongatapu Mateni Tapueluelu na’e ‘ikai ke totongi kimu’a pea fakahoko ‘a e Fili Fale Alea ‘i Nōvema 2015.

Na’e fakahā foki ‘e he ‘Ateni Seniale Le’ole’o ‘Aminiasi Kefu ki he ongoongo ‘a e Matangitonga kuo ma’u ha fakamatala fakamo’oni mei he Failēsisita ‘o e Fakamaau’anga Lahi ‘o pehe na’e ‘i ai ‘a e mo’ua ‘o Tapueluleu ‘o a’u ki he ‘aho na’e lesisita ai ke hoko ko e Kanititeiti kimu’a ‘i he Fili Nōvema 2014.

Kapau leva ‘e hoko ‘a e fakatonutonu fakalao ko’eni pea fakamo’oni’i ‘oku mo’oni na'e 'i ai 'a e mo'ua 'o Tpueluelu pea na'e 'ikai totongi, ‘oku malava leva ‘o fakatatau ki he Lao Fili Fale Alea 1989 (Electoral Act 1989) ke fakata’e’aonga’i ‘a e hoko ‘a Tapueluelu ko e Memipa Fale Alea ma’a e vahenga Tongatapu 4.

Na’e ngāue foki ‘a e Komisoni Fili ki hono vakai’i ‘a e me’a ni hili ia hano ‘ohake ‘e he ‘Ofisi ‘o e ‘Ateni Seniale ‘a e kaveinga ni. 'Oku toe mahino foki kapau 'e iku 'o fakamo'oni'i 'a e tukuaki'i ko'eni pea 'oku malava leva ke fai hano tālanga'i 'a e tu'unga falala'anga 'o e fakahkofatongia 'a e Komisoni Fili 'o makatu'unga 'i he malava ke hoko ha fehalaaki peheni kae tautautefito ki he pelepelengesi 'o e ngaahi tu'unga fili pehe ni.

‘Oku lahi foki ‘a hono tālanga’i ‘o e kaveinga ni ka ‘oku mahino mai ‘oku te’eki ai ke fakahoko ‘a e ngāue fakalao ko’eni ‘o fakatatau ki he fakamatala kuo ma'u mei he ‘Ateni Seniale Le’ole’o. Kaikehe ‘e malie foki hano muimui’i ‘o e kaveinga ni pea kuo lele mu'a 'a e ngaahi letioo kalasini mo e telelouniu ka ‘e toki veteki kotoa 'eni mei he Fakamaau’anga.

'Oku 'ikai puli 'oku siofi 'e he kau politikale 'o e vāhenga ni 'a e tukutuku'au atu ko'eni 'a e kaveinga ni he 'oku malava pe ke toe fakahoko ha fili si'i. Ko 'Isileli Pulu foki na'e fika ua 'i he fili 'a e Vahenga Tongatapu 4 'i Novema 2014.