Tangi e Kalauni ki he Fakamaau’anga Lahi ke ta’ofi e Minisitā Lao ke 'oua ‘e toe folau Featured
Minisitā Lao Sione Vuna Faka’otusia
17 Siulai, 2019. Na’e fakahū atu ki he Fakamaau’anga Lahi ‘a e tangi ‘a e Kalauni ‘a ia ko kinautolu ‘oku talatalaaki ‘i he hopo ‘i he vaha’a ‘o e Minisitā Lao Sione Vuna Faka’otusia mo e kau Polisi 'a ia 'oku fekau'aki 'a e tangi ko'eni mo e tu’utu’uni ‘a e Fakaamaau’anga Polisi ke faka’atā ‘a e Minisitā mei hono malu'i 'o kau ai mo hono ta'ofi ke folau ki muli pe koha toe feitu’u pe 'i he ngaahi 'otu motu 'o Tonga ni.
Ko e tangi ko’eni ‘a e Kalauni ‘oku makatu’unga ia ‘i he ‘enau ta’e fiemalie ki he founga na’e fakahū ‘aki ‘a e kole faka’atā mei he ngaahi fakangatangata ki ha tokotaha ‘oku faka’ilo ‘a ia ‘oku ‘iloa he lea faka-Pilitānia koe "application for bail".
Kuo fakamahino mei he Kalauni koe founga na’e fakahoko ‘aki ‘a e kole faka’atā ko’eni ‘a e Minisitā Lao na’e fakafou mai pe ia ‘i ha tohi ‘a e CEO Le’ole’o ‘a e Potungāue Lao ‘o fakafofonga’i mai ‘a e Minisitā ke faka’atā hono hingoa mei he lisi ‘o kinautolu ‘oku ta’ofi ke folau mei Tonga ni pea 'oku 'ikai fakalao 'a e founga ko'eni.
Na'e faka'ilo foki 'a e Minisitā Lao Sione Vuna Faka’otusia ki he'ene fakafaingata'a'ia'i 'a e ngāue 'a e kau Polisi 'o kau ai mo 'ene ngāue'aki 'a e lea ta'etaau ki he taha 'o e kau 'ofisa polisi mo fakamanamana tene fana kinautolu pea 'oku te'eki ke fakahoko 'a e hopo ko'eni pea 'oku lolotonga malu'i ki tu'a 'a e Minisitā Lao Sione Vuna Faka’otusia pea ta'ofi mo ha'ane toe folau ki muli.
'Oku mahino foki mei he Fakamaau'anga koe founga 'oku fakahoko 'aki ha kole peila (Application fo Bail) kuo pau ke fakahoko ha kole mei he loea 'oku ne fakafofonga'i 'a e Minisitā ki he Fakamaau'anga pea fakahoko mo 'ene fuakava poupou (affidavit) 'a e Minisitā tene tauhi ki he ngaahi tu'utu'uni 'a e Fakamaau'anga kapau 'e peila ia pea kuo pau ke 'i ai mo e tokoua falala'anga 'i he sosaieti kena fakamo'oni malu'i ma'ana.
'Oku fakaloloma foki 'a e ongona mai 'a e tangi ko'eni 'a e Kalauni he 'oku fehu'ia ai 'a e tu'unga taau 'o e Minisitā Lao 'a e fonua 'a ia 'oku ne toe takimu'a pe ia 'i he maumau'i 'a e lao lolotonga ia 'oku muimui 'a e toenga 'o e kakai 'o e fonua ki he founga ngaue 'a e Fakamaau'anga mo e lao.
'Oku tui foki 'a e tokolahi kapau koe hoko 'a e fa'ahinga to'onga mo e founga ko'eni 'i ha fonua muli 'e 'otometiki pe 'a e fakafisi 'a e Minisitā mei he fatongia tautautefito ki he Minisitā 'oku ne tauhi mo takanga'i 'a e lao mo e malu 'a e fonua.
4 comments
-
Malie lahi 'etau ki'i sangasanga.....Fkmafao e Lao kihe fa'ahinga pea Fkngalokuloku kihe ni'ihi.
-
Ko e ha koa' óku kei ngaue ai kuo ósi tonu ke i ápi ó fai ai é ne tauátaina. Ko e meá eni óku nau vivili ki ai tokua ke taófi hono fakaehaua e kakai é he Houéiki mo e kau Taki ó e Puleánga mo e fonua pea ko eni ko nautolu pe kau PATOA óku takimuá hono fai. Teéki pe keu manatu ki ha kuonga faingataá pe he ni. Taumaiá ke ongo ki Loto Tatau á e faingataáía á e kakai ó e Fonua mo énau fakaámu ke fei mo fai ha aofangatuku á e Tama Tuí ke veteki e kií kau fie langafonua foóu ko eni. Ne ui fakataha a Tuí Uata í Vahe Foa he ósi á e Show ko e tuúaki ai pe ke fili e kau nopele é he kakai meápango naé fai atu ki he toenga toúhilinoa ó e Vahe Foa ka ko hono totonu ke nau mavahe mei he faáhinga vale óku nau fetangutuí ai ó halaki feinga ke lava hono fua é nau fanga kii kavenga fakaápi fakafoítuitui. Kuo hiki fonua e kakai ako ki Tongatapu mo muli pea koe toenga ko e "Hala he Fika mo e Laukonga".
-
Kuo fuoloa 'ete mavahe mei he fale ni, pea 'oku te hu mai pe 'o mei fulutamakia he ngaahi ongoongo ko'eni.
Ko e me'a eni na'e vivili ai a e kau Minisita kenau fili pe enau kau CEO koe'uhi kenau pule'i pehe ni.
Ka 'oku tau sio atu 'e malava pe a e CEO Le'ole'o ia ke faitohi i hano fekau'i, ka ko e Fakamaau na'a ne fai 'a e tu'utu'u ni 'oku tonu ke fai ha ngaue kiai. 'Oku 'alu pe taimi mo e toe malie ange 'a e ngaahi fo'i faiva tete 'oku 'eti mei he Pule'anga 'o e Kakai. -
He needs to resign or suspended with leave without pay for breaking the law, and wait for the result of the court case. If he is convicted, then he should resign ASAP.