Mo’ua laumano Semisi Sika faihala 'i he Liiki pea totongi ‘e he Liiki ‘a e Mo’ua Featured
Tokoni Palemia Semisi Sika
1 'Aokosi, 2018. ‘Oku kei fakatumutumu ‘a e tokolahi ‘i he fonua ‘i he to’onga mo e founga ‘a e kau taki ‘o e fonua pea ‘oku mata’a’a ‘a e faihala mo hono pa’usi’i ‘a e sipoti mo e pa’anga ‘a e kakai ‘o a’u pe ‘eni ki he Tokoni Palemia Semisi Sika.
Na’e faka’ilo foki ‘a Semisi Sika ko e Sea ‘o e Komiti Liiki Fakafonua ‘a Tonga (TNRL) fakataha mo hono tokoni Stan Tu’amoheloa ‘e Silivenusi Taumoepeau mo ha ni’ihi kehe fekau’aki mo ‘ena liliu ta’e fakalao ‘a e Konisitutone ‘a e Kautaha Liiki Fakafonua.
Na’e kau foki heni ‘a e ngaue hala ‘aki ‘a e mafai, ‘ikai muimui he founga ngaue mo e pa’anga ‘o fepaki ia moe Konisitutone ‘a TNRL.
Na’e tu’utu’uni ai pe foki ‘e he Tu’i Fakamaau Lahi ‘i he ta’u 2016 ‘o tali ‘a e ‘eke ‘a e kau Talatalaaki pea tu’utu’uni ke;
1. Ke fakahoko leva hano ‘atita’i ‘a e tu’unga faka-pa’anga ‘a e TNRL mei he ta’u 2012 ki he 2015.
2. Ke fakahoko leva ha fili Lakanga ‘o fakatatau ki he tu’utu’uni ‘a e Konisitūtone ‘a e Poate mo e Lao.
3. Ke ‘oua na’a toe ngofua ke ngāue’aki ha pa’anga ‘a e Poate kae ‘oua leva kuo maau malie ha fili lakanga.
Ko e fakamole ki he totongi loea ‘a e Talatalaaki mo e ngaahi fakamole ‘a e fa’ahi ‘a e Talatalaaki ‘i he fakatonutonu ko’eni na’e fe’unga mo e $33,567-00.
Na’e fuoloa ‘a hono tuku ‘ikai totongi ‘o e mo’ua ko’eni pea na’e ngaue atu ‘a e Loea ‘a e Talatalaaki (William Edwars Jr. ki he Fakamaau’anga ke fakamalohi’i hono totongi ‘o e mo’ua ko’eni ‘o iku ai ke totongi ‘a e mo’ua ni ‘i he ‘aho 20 ‘o Siulai ‘o e ta’u ni ‘a ia koe uike nai ia ‘e ua kuo maliu atu.
‘Oku mahino mai kuo ‘osi totongi ‘a e mo’ua ko’eni ‘o Semisi Sika mo Stan Tu’amoheloa pea ‘oku fakaofo ko hono totongi pe ‘a e mo’ua ko’eni ‘e he Kautaha Liiki Fakafonua ‘a Tonga mei he sieke fika: 914131 010 930 110 0742 ‘a e Tonga National Rugby League Inc.
‘Oku fehu’ia ‘a e tu’unga fakalao ‘o e totongi mo’ua ko’eni pea ‘oku ma’u ‘e he ongoongo ni ha fakamatala falalala’anga ‘e toe fakahoko ‘a e fakatonutonu fekau’aki mo e me’a ni.
