Ngaue popula ta'u 20 matapule Tonga ko ‘Alani Afu 'i 'Aositelelia ki he fakapo Featured
Ko 'Alani Afu 'i hono fakafoki faka-Pule'anga ki 'Aositelelia. 'Oku 'asi he taa ni mo e pekia Rita Caleo.
29 July, 2018. Kuo tautea ‘e he Fakamaau’anga Lahi ‘a Niusauele ‘i ‘Aositelelia ‘a e matapule Tonga ko ‘Alani Afu ta’u 51 ‘a ia na’e toe ‘iloa ko ‘Alani Koloamatangi ‘i he faka’osinga ‘o e uike ni kene ngaue popula ki he ta’u ‘e 20 ki he hia tamate (fakapo).
Ko hono tautea ‘eni ‘o ‘Alani Afu fakataha mo ‘ene pule ngaue he taimi na’e fakahoko ai hia ni ‘i he ta’u 1990 koe matapule ta’u 55 ko Mark Caleo.
‘Oku tautea foki ‘a Mark Caleo ia kene ngaue popula ‘i he ta’u ‘e 12 ki he kaunga kau ki he fakapo ko’eni.
Na’e ngaue foki ‘a ‘Alani ko e tangata le’o ‘i he falekai ‘o Caleo pea na’e hoko ai hono totongi’i ‘e Caleo ‘a e pa’anga ‘Aositelelia ‘e $10,000-00 kia ‘Alani kene fakapoongi hono mali Rita Caleo ‘i he ta’u 1990.
Na’e fakahoko foki ‘a e fakapo ko’eni ‘i he po’uli hifo ‘o e ‘aho 10 ‘o ‘Okatopa 1990 ‘a ia na’e hoka’i tu’o 23 ‘e ‘Alani ‘a Rita ‘aki ha hele pea na’e palani’i ‘eni ke hange na’e tupu ‘a e mate ko’eni mei ha kaiha’a fakamalohi.
Na’e ‘uluaki fakapoongi pe foki ‘a e tuonga’ane ia ‘o Rita ‘i he ta’u 1989 ‘i he natula moe founga tatau ka ‘oku kei misiteli pe foki ‘a e keisi koia ‘o te’eki fai ha ngaue kiai.
‘Oku mahino mai foki ko Rita Caleo mo hono tuonga’ane ko’ena omai mei ha famili ‘oku ma’u me’a mei ‘Esia pea na’e ‘i aim o ‘enau pisinisi ‘i ‘Aositelelia.
Na’e tukuaki’i pe foki ‘e Rita ‘a hono mali Mark Caleo mo ha ni’ihi kehe ki he mate hono tuonga’ane ka na’e te’eki solova ‘a e keisi ko’eni.
Na’e hola mai foki ‘a ‘Alani ki Tonga ni pea na’e fakafoki faka-pule’anga (extradite) ia mei Tonga ni ki ‘Aositelelia ke fahoko hono fakamaau’i ‘i 'Okatopa ta’u 2016.
Na’e mali ‘a ‘Alani ‘i Tonga ni pea na’e nofo Vaini mo e fanau ‘e toko ono he ta’u lahi kimu’a pea toki fakafoki ia ki ‘Aositelelia.
