Faka’ilo kautaha me’alele Monu’ia He Kelesi ko e ma’u pa’anga ‘i he fakamatala loi ^Featured

'Oku fekau'aki tonu 'eni moha launga 'a e tangata'eiki faifekau mei Vava'u fekau'aki mo'ene ki'i me'alele na'e fakatau mei he kautaha ni.

Kuo ma’u ‘e he ongoongo ni ‘a e fakamatala mei he faifekau ni pehe ki he’ene Fakafofonga Lao fekau’aki mo e me’a ni pea ‘oku fakaloloma ‘a e me’a ‘oku hoko kae tautautefito ki he ‘ikai toe afe ‘a e pau’u ‘a e fanga ki’i kautaha fakatau me’alele ‘o a’u ki he kau faifekau ‘oku ‘ikai pe kenautoe afe.

Ko e kautaha ‘eni ‘a e Matāpule ko Siua Lavaki Tupou pea koia ‘oku pule pea ‘oku tu’u pe ‘a e kautaha ko’eni ‘i Mataika, Tongatapu. Fakatatau ki he fakamatala ‘a e faifekau na’a na alea mo Siua ‘i he ‘aho 12 ‘Okatopa 2017 ‘e fakatau ‘e he faifekau ‘a e me’alele Mitsubishi Pajero IO ‘aki ‘a e kava efuefu.

Na’e fakaheka mai ‘a e kava kilo ‘e 84 ‘a ia koe kava efuefu pea koe mahu’inga koe pa’anga ‘e $120-00 ki he kilo ‘a ia koe mahu’inga fakakatoa ‘o e kava na’e ‘ave ki he kautaha ko e $10,080-00 neongo koe totongi ‘o e kava he taimi koia na’e a’u ki he ki he pa’anga ‘e $150-00 pe toe laka hake ai ki he kilo.

Na’e toutou tuku hake foki ‘e Siua ‘i he facebook ki he faifekau ‘a e taa ‘o e me’alele lanu navy blue tokua koe me’alele ia ‘a e faifekau pea na’e a’u atu pe kiha taimi kuo toe tuku atu moe taa  ‘o e me’alele tatau pe Mitsubishi Pajero IO ka ‘oku lanu hinehine ‘i he ‘aho 24 ‘o Tisema 2017 (koe taa 'oku ha atu 'i 'olunga) pea ‘oku tu’u pe he uafu koe teuteu tokua ke fakaheka ki Vava’u ki he faifekau.

‘I hano faka’eke’eke ‘e he ongoongo ni ‘a e faifekau na’e toe fetu’utaki ‘i he ‘aho 27 ‘o Tisema 2017 kia Siua pea fakaha mai ‘e Siua ‘oku toutou feinga ki uafu ke ma’u ha vaka ke fakaheka ai ‘ene me’alele. Na’e toe fetu’utaki ‘a e Siua he ‘aho 2 ‘o Sanuali 2018 ki he faifekau ‘o fakaha kiai ‘oku ne kei tali vaka pe ke heka ange ai tokua mo e uta me’alele ‘a Vava’u ‘o kau ai ‘a e me’alele ‘a e faifekau.

‘I he fakamatala ‘a e faifekau na’e toe kole ange Siua ia ke toe ‘omai mo e pa’anga ‘e $1000-00 ki hono fakaheka ange ‘ene me’alele ‘i he ‘aho 3 ‘o Sanuali 2018 pea neongo ‘ene faingata’a ka na’e toe feinga ‘o noo pea talafi kia Siua ka ta koaa koe fo’i usu ‘ata’ataa pe ia.

‘Oku a’u mai ki he ‘aho ni ‘oku te’eki pe ke fakaheka ‘a e me’alele ‘a e faifekau ki Vava’u pea ‘oku ‘ikai ke toe ha fakamatala kehekehe hono fakahoko ange kiate ia ‘o a’u ki he ‘ikai pe toe tali ‘a e telefoni ia ‘a Siua.

Na’e kumi fale’i fakalao ‘a e faifekau pea fetu’utaki ai ‘a e ‘ofisi ‘o e Fakafofonga Lao ‘a e faifekau kia Siua ‘i he ‘aho Monite 29 ‘o Sanuali 2018 pea fakaha mei ai ‘oku maau pe me’alele ia ‘a e faifekau ka ‘oku ‘ikai kene ‘ilo pe koe ha ‘oku hoha’a ai pea koe me’alele ‘eni ‘oku tau pe honau ‘api ('api 'o Siua). Na’e toe fetu’utaki ‘a e ‘ofisi kia Siua ‘i he ‘aho 6 Fepueli ke ‘omai aa ‘a e me’alele kenau fakaheka ‘e kinautolu pea na’e kehe ‘a e fakamatala ia na’e ‘omai.

Na’e tohi faka’ofisiale leva ‘a e Fakafofonga Lao ‘a e faifekau Clive Edwards kia Siua ‘i he ‘aho 8 ‘o Fepueli ‘o tukuange kia Siua ‘a e houa ‘e 24 ke ‘omai ai ‘a e me’alele ‘a e faifekau pe ko hono fakafoki mai ‘ene seniti mo e ‘ikai pe.

Fakatatau ki he fakamatala ‘a e faifekau ‘oku ongo kiate ia ‘a e me’a kuo hoko he koe malo ‘a hono ma’u ha seniti ke feinga’i ‘aki ha ki’i va’e koe famili mo e fatongia faka-lotu pea koe faka’ofa atu ‘a e mahino kuo siva ‘a e ‘amanaki.

Kuo fakahoko foki hano faka’ilo ‘e he kau polisi ni ‘a Siua mo e kautaha pea ‘oku lolotonga ngaue atu ‘a e Fakafofonga Lao ‘a e faifekau ke fakahoko hano toe faka’ilo sivile ‘o e kautaha ni pehe ki he pule.

Ko e kaveinga ‘eni ‘oku mafatukituki pea ‘oku lahi ‘ene hoko pea koe fakatokanga ‘eni ki he kakai ‘o e fonua kenau tokanga he ‘oku totu’a ‘a e pau’u ‘a e ni'ihi 'o e fanga ki’i kautaha fakatau me’alele 'i he fonua ni.