Ikuna Siasi Tokaikolo ‘i he Fakamaau’anga Tangi: 'Aho 'e 21 ke mavahe ‘a e Mo’ui Fo’ou mei Kolomotu’a Featured
Falelotu Tokaikolo 'Ia Kalaisi Kolomotu'a
26 Ma’asi, 2018. Kuo tali ‘e he Fakamaau’anga Tangi ‘a e tangi ‘a e Siasi Tokaikolo 'Ia Kalaisi fekau’aki mo e tu’utu’uni ‘a e Fakamaau Lahi ko Justice Scott ‘i he Fakamaau’anga Lahi ‘i he ta’u 2017 ke foaki ‘a e kelekele mo e koloa ‘a e Siasi Tokaikolo ‘i Kolomotu’a ki he Feohi’anga Mo’ui Fo’ou ‘a ia ‘oku taki mai ai ‘a Faifekau Sione Maile mo Dr. Pohiva Tui’onetoa.
Na’e fakahoko foki ‘a e ‘eke ‘a e Siasi Tokaikolo ‘Ia Kalaisi ‘i he ta’u 2017 ke fakafoki ange ‘enau koloa ‘a ia na’e puke ‘eni ‘e kinautolu na’e mavahe mei he Siasi Tokaikolo 'Ia Kalaisi ‘o fokotu’u ‘a e Feohi'anga Mo’ui Fo’ou pea na’a nau taukave’i koe koloa 'oku 'anautolu pe ia pea 'ikai ha kaunga kiai 'a e Siasi Tokaikolo 'Ia Kalaisi.
Na’e tangi foki ‘a e Siasi Tokaikolo ki he Fakamaau’anga Tangi pea tu’utu’uni ai ‘i he pongipongi ni ‘e he kau Fakamaau Lahi ‘e toko 3 ke fakafoki ‘a e kelekele mo e koloa koe koloa ia ‘a e Siasi Toakikolo ‘Ia Kalaisi.
Ko e koloa ko’eni koe kelekele, falelotu mo e falenofo’anga faifekau ‘a ia na’e tu’utu’uni ‘e he Fakamaau’anga Tangi koe koloa totonu pe ia ‘a e Siasi Tokaikolo ‘Ia Kalasi pea na’e hala ‘a e tu’utu’uni ‘a e Fakamaau’anga Lahi ke foaki ki he Feohi’anga Mo’ui Fo’ou 'a e koloa ko'eni.
Na'e taukave'i foki 'e he Feohi'anga Mo'ui Fo'ou 'a e mavahe 'a e Siasi Tokaikolo mei he Tokateline na'e kamata'aki 'a e Siasi pea koe 'uhinga ia 'enau mavahe pea na'a nau tukuaki'i 'a e Palesiteni 'o e Siasi Tokaikolo 'Ia Kalaisi Dr. Liufau Vailea Saulala 'oku ne fakaaoao tokua 'i he Siasi.
'Ikai ngata ai na'a nau toe taukave'i ko e langa 'a Kolomotu'a na'e fai pe ia 'e he kakai 'o Kolomotu'a 'o 'ikai ha kaunga kiai 'a e Siasi Tokaikolo 'Ia Kalaisi.
Ko e ngaahi taukave mo e tukuaki'i ko'eni na'e 'ikai tali ia 'e he Fakamaau'anga Tangi pea 'ikai lava ke fakamo'oni'i 'enau tukuaki'i 'a e Tangata'eiki Palesiteni.
Na'e fakamamafa'i foki ;e he Fakamaau'anga Tangi koe fakatonutonu 'eni ia 'i he koloa pea 'oku mahino lelei pe 'a kinautolu 'oku totonu ki he koloa.
Na’e toe tu'utu'uni foki ke lesisita 'a e kelekele mo e koloa ko'eni 'i he Siasi Tokaikolo 'Ia Kalaisi pea tukuange foki ‘i he tu’utu’uni ko’eni ‘a e ‘aho ‘e 21 ke fetukutuku ai 'a e Feohi'anga Mo'ui Fo'ou pea ke totongi kotoa mo e ngaahi fakamole ‘a e tafa’aki ‘a e Siasi Tokaikolo.
Ko e tu’utu’uni foki ko’eni ‘oku aofangatuku pea ko hono tuki tapuni ia ‘a e peesi ‘o e fakatonutonu ko’eni.
Ko William Clive Edwards Sr. na’a ne fakafofonga’i ‘a e Siasi Tokaikolo 'Ia Kalasi pea Laki Niua ma’a e Feohi’anga Mo’ui Fo’ou.
2 comments
-
Kapau ko ho'o 'uhinga 'ena Mark pea 'oku totonu ke 'oua teke toe fakaanga'i 'a e Pule'anga kae fai 'a e fefakamolemole'aki. Koe fakamaau'anga koe founga faka lotu ia mo fakasivilaise pea tene 'omai e totonu.
-
'Oku ha sino mai pe he mo'ui moe to'onga ongo ngata'a moe ta'etopono 'ae kakai 'ae founga fai 'oe lotu he fonua ni. Kuo ha e fakamolemole'aki ia mo e fulihi e kou'ahe 'e taha, kuo nau tau ta'aki ai 'o 'osi kotoa e ngaahi fakamaau'anga 'o Tonga ni hono fakatonutonu kinautolu. Pea koe pehe ai ke tau fakatetua' kiha to'utangata mo ha to'utupu maau, uouohongataha mo talangofua kapau koe sipinga ena 'oku ta mai 'ehe kau lotu ke tau fa'ifa'itaki ki ai. Ta he'ikai toe 'osi e 'ekisiteni, tamate, tohotoho inu kava malohi, faito'o kona tapu moe ke fakamanu 'ae fanau he ko ena kuo nau sio tonu pe he fekainaki 'ae kau taki lotu. Takitaha tuli 'ene tonuhia mo kumi 'ene totonu fakamatelie kae si'i tuenoa a Folofola ia mo Laumalie Ma'oni'oni.
He'ikai liliu e mo'ui moe 'ulungaanga fita'a 'o e kakai kapau he'ikai kamata e liliu mei he kau fa'ifa'itaki'anga pe role models.