Tu’utu’uni Fakamaau’anga Lahi ‘ikai fakalao hono monomono Konisitutone Poate ‘Akapulu ‘a Tonga ^Featured

Na’e makatu’inga ‘a e tuutu’uni ko’eni ‘i ha faka’ilo ‘e he kau talatalaaki ‘a ia na'a nau tukuaki’i na’e ‘ikai ‘oange ha fakamanatu (notice) ki he kau memipa na’a nau kau atu ki he fakataha lahi faka-ta’u ‘a e Poate (AGM) ‘e fakahoko hano monomono ‘o e konisitutone pea na’e ‘ikai fakapaasi ‘eni ‘e he tokolahi (majority) koe laka hake he peseti ‘e 75 ‘o hange koe tu’utu’uni ‘a e konisitutone ‘a e Poate.

Ko Feleti Faka’otusia na’a ne fakafofonga’i ‘a e kau talatalaaki ‘a ia koia ‘oku Palesiteni he Kalapu ‘Akapulu Spartan ‘a Ha’ateiho.

‘I he fakamatala 'a Faka’otusia koia ‘oku fakafofonga ma’ae ‘Iunioni faka-vahe ‘a e Vaheloto pea ‘oku ‘i ai ‘ene totonu ke kau atu ki he fakataha ni ka na’e ‘ikai fakaha kiate kinautolu ‘e monomono mo liliu e konisitutone.

Fakatatau ki he fakamatala ‘a Faka’otusia na’e toki tufa ange pe ‘e monomono ‘a e konisitutone taimi si’i pea kamata ‘a e fakataha.

Na’e kau foki ‘i he monomono mo e liliu ko’eni ‘a hono liliu mei he peseti ‘e 75 kenau fakapaasi ha liliu ki he konisitutone ki he tokolahi pe ‘i ha paloti, ko hono fili ‘o e Palemia ke hoko ko e Palesiteni ‘o e Poate mo hono to’o ‘o e totonu ‘a e kau memipa ki hono fili ‘o e Palesisteni pehe ki hono fakatokosi’i ‘o e kau fakafofonga mei he ngaahi ‘Iunioni iiki (sub-unions) na’a nau memipa ‘i he Poate ‘Akapulu.

Na’e kau foki ki heni ‘a hono fokotu’u ke fili ‘a e kau va’inga lokolo kenau kau atu ki he Timi ‘Ikale Tahi mo e tokolahi pau ‘oku fiema’u ma’ae kau va’inga faka-lotofonua.

Na’e fakamahino ‘e he Tu’I Fakamaau Lahi ‘a e ta’e fakalao ‘a e ngaue ko’eni mo e ‘ikai muimui ‘a e fakataha mo e founga hono liliu ‘o e konisitutone ‘a e Poate ‘Akapulu ki he tu’utu’uni ‘a e Konisitutone mo e Lao.

‘I he’ene pehe foki fakatatau ki he tu’utu’uni ko’eni koe ngaahi liliu mo e monomono na’e fakahoko ki he konisitutone ‘a e Poate ‘Akapulu ‘a Tonga ‘oku ‘ikai fakalao pea koe ngaahi liliu mo e ngaahi fokotu'u lakanga 'i he malumalu 'o e liliu mo e monomono ko'eni 'oku totonu ke fakata'e'aonga'i.