Tangi ‘a e Siasi Tokaikolo ‘Ia Kalaisi fekau’aki mo e tu’utu’uni ‘a e Fakamaau’anga Lahi Featured
12 Sepitema, 2017. Kuo fakamahino mei he loea ‘a e Siasi Tokaikolo ‘Ia Kalaisi William Clive Edwards ‘oku ‘amanaki ke fakahū atu ‘a e tangi ‘a e Siasi Tokaikolo ‘Ia Kalaisi ki he Fakamaau’anga Tangi fekau’aki mo e tu’utu’uni ‘a e Fakamaau Lahi ko Michael Scott na’e fakahoko ‘i he faka’osinga ‘o e mahina ko ‘Aokosi.
Ko e tu’utu’uni foki ‘eni ‘a Scott ke ma’u ‘e he Feohi’anga Moui Fo’ou ‘a ia na’e mapaki mei he Tokaikolo ‘i he ta’u 2012 ‘a e koloa ‘a e Siasi ‘i Kolomotu’a.
Ko e tangi ko’eni ‘oku makatu’unga ia ‘i he ‘ikai fiemalie ‘a e Siasi Tokaikolo ki he tu’utu’uni ‘a e Fakamaau’anga Lahi ‘i he fakatonutonu ko’eni.
Na’e fakahoko foki ‘a e fakatonutonu ‘a e ongo tafa’aki ni ‘i he koloa ‘a e siasi ‘i Ha’ateiho ‘i he ta’u 2016 pea na’e tu’utu’uni aofangatuku ai ‘a e Fakamaau’anga Tangi ke fakafoki ‘a e koloa ‘i Ha’ateiho ki he Siasi Tokaikolo ‘Ia Kalaisi.
‘Oku fakafofonga’i foki ‘a e Siasi Tokaikolo ‘Ia Kalaisi ‘e William Clive Edwards pea ko Laki Niua ma’a e Feohi’anga Mo’ui Fo’ou.
