Faka'ilo matapule ko e ngaue'aki 'a e tohi loi ke ma'u ha paasipooti ^Featured

Na'e fakahoko ai 'e he va'a ni ha tohi kumi koloa 'e tolu pea puke ai moha matapule ta'u 43 mei Kolofo'ou he 'aho 2 'o 'Aokosi 'o fakahu pilisone pea tukuaki'i ki hono ngaue'aki 'a e tohi kakaa ke ma'u ai ha paasipooti.

'Oku faka'ilo foki 'a e matapule ni ki he ngaue'aki 'a e tohi loi mo kakaa pea na'e tauhi ia ki tu'a 'o fakaongoongo ai kene ha 'i he Fakamaau'anga 'i he 'aho 16 'Okatopa 2017.

Ko e keisi 'aki 'eni hono ua fakatatau ki he fakamatala mei he Potungaue Polisi kuo ngaue'aki ai 'a e sisitemi 'a e Potungaue Lao ke ma'u ha tohi kakaa 'o fakataumu'a ke ma'u 'aki ha paasipooti.

Kuo 'osi mo'ua foki ha toko 5 ki mu'a 'i he Fakamaau'anga 'i hono faka'ilo ki he hia fekau'aki moe paasipooti pea kuo ngaue tautea ngaue popula ai 'a e ni'ihi ko'eni.

'Oku fakamamafa'i foki 'e he 'ulu 'o e va'a fakatotolo ki he ngaahi hia fekau'aki mo e paasipooti 'Unga Fa'aoa 'a e mahu'inga 'o e fakatotolo 'oku fakahoko 'e he va'a ni pea mo e ngaahi hia 'oku fakahoko ke ma'u ai 'a e paasipooti Tonga ma'a e kakai Tonga pe moe  kau muli foki.

'Oku hokohoko atu pe 'a e fakatotolo ni pea 'oku fengaue'aki ai 'a e Potungaue Polisi, Potungaue Lao mo e Va'a ki he Kaati Fakafonua.