Lavea ha matāpule ‘i Holonga Vava’u mei hano fana’i ^Featured

Ko e matāpule na’e fana’i ‘oku lolotonga tokoto ‘i he Falemahaki Vaiola hili ia hano fakafolau vakapuna mai mei Vava’u.

Fakatatau ki he fakamatala ‘a e ni’ihi mei he kolo ni na’e hoko ‘a e me’a ni fakafuofua ki he taimi 2 ki he 3 ‘o e hengihengi Falaite.

Na’e fai ha felauaki ‘a ha tokoua ‘oku na kasini pe pea na’e kau atu kiai mo e matāpule (faka’iloa) na’a ne fakahoko ‘a e fana.

Na’e foki mai ‘a e faka’iloa ‘oku inu atu hono kasini pea koe tokotaha ‘oku ne tokoua ‘aki mo hono kaunga tangata ‘i honau toumu’a. Na’a na felauaki ai mo hono kasini he na’e ‘ikai ke loto ki he’enau inu ‘i hono toumu’a.

‘I he fakamatala ‘a e Matangitonga na’e ‘i ai ha tokotaha na’a ne puekpuke mo ta’ofi a e felauaki ko’eni pea hili ia na’e kolosi leva ‘a e tokotaha ko’eni na’a ne ta’ofi ‘a e felauaki ko’eni ki he kauhala ‘e taha.

Na’a ne fetaulaki ai moha mataupule pea na’a lue ai pe kinaua. Na’e ‘ita lahi heni ‘a e faka’iloa ‘o to’o mai ‘a e me’afana mei he;ene me’alele ‘o fana’i ‘aki ‘a e tokotaha na’a ne ta’ofi ‘ena felauaki.

Ko e pango he na’e tau ‘a e fana ia ko’eni he matāpule na’a na lue mo e tokotaha na’ene ta’ofi ‘a e felauaki ko’eni.

Ko e me’ataua na’e fakahoko ‘aki ‘a e fana koe shotgun ‘a ia ‘oku kau ia he kalasi me’afana ‘oku ui anga maheni ‘aki koe me’afana 12.

Kuo faka’ilo foki ‘a e faka’iloa ki he fakalavea lahi mo hono tauhi ‘o ha me’atau ‘ikai ma’u ha laiseni kiai.