Ko e langa pe ia ‘a Kolomotu’a pea na’e ‘ikai tokoni kiai ‘a e Tokaikolo: Dr. Pohiva Tui’onetoa ^Featured

Ko e fakamo’oni faka’osi foki ma’a e tafa’aki ‘a e Faka’iloa ‘a ia ko e Faka’iloa ‘Uluaki pe ia ‘i he hopo sivile ko’eni ko Faifekau Dr. Pohiva Tui’onetoa.

Ko e hopo foki ‘eni ‘i hono ‘eke ‘e he Siasi Tokaikolo ‘Ia Kalaisi ke fakafoki ange ‘a e koloa ‘a e siasi kau ai ‘a e Falelotu, Fale Nofo’anga mo e Holo hili ‘a e mavahe ‘a e konga lahi ‘o e kaingalotu Kolomotu’a ki he Feohi’anga Mo’ui Fo’ou ‘oku tataki ‘e Faifekau Sione Maile ‘i he ta’u 2012.

‘Oku taukave’i foki ‘e Tui’onetoa mo e tokolahi taha ‘o e kau fakamo’oni ‘a e tafa’aki ‘a e Faka’iloa ‘a ia na’e a’u ki he toko 20 pe ofi kiai koe langa ‘o e Falelotu ‘o Kolomotu’a 'i he ta’u 2009 lolotonga ‘enau ‘i he malumalu ‘o e Siasi Tokaikolo ‘ia Kalaisi na’e fai ‘ata’atā pe ia ‘e he kainga Kolomotu’a ‘o ‘ikai ha tokoni mei he Siasi Tokaikolo ‘Ia Kalaisi.

‘Oku mālie foki ‘a e taukave ko’eni he ‘oku fepaki ia mo e fakamatala fakamo’oni ‘a e Tafa’aki ‘a e Talatalaaki ‘a ia koe Siasi Tokaikolo ia ‘o fakamahino ’e he tokolahi ‘o e kau faifekau ‘o e Siasi Tokaikolo na’e lava mei muli ki he hopo ni.

Na’a nau fakamatala fakamo’oni ko e feinga pa’anga ki he langa falelotu ko’eni ‘a Kolomotu’a kau kiai mo e Fale Nofo’anga Faifekau na’e kau kiai ‘a e Siasi Tokaikolo mo hono kau memipa pea na’e folau ange ‘a e kau memipa ‘o e siasi  'o Kolomotu’a ‘o kumi pa’anga mei he ngaahi fai’angalotu ‘o e Siasi Tokaikolo ‘i Nu’usila, ‘Aositelēlia, mo ‘Amelika pea koe founga anga maheni pe 'eni 'o tatau ki he ngaahi fungavaka kehe.

Na’e fakamatala ‘a e tokolahi taha 'o e kau fakamo'oni 'a e tafa'aki 'a e Talatalaaki 'a ia na’e 'ova he toko 20 na'e toe tanaki pa’anga mo e kainga lotu ‘o e Siasi Tokaikolo ‘o foaki ke tokoni ki he ngaue ‘i he ‘aho na’e huufi ai ‘a e Falelotu ‘i Tisema 2009.

Ka ‘i he fakamatala ‘a Tui’oneoa na’a ne pehē ai na’e fakahoko pe ‘a e folau feing pa’anga koe taumu’a pe ia ki he kainga Kolomotu’a ‘i muli ka ‘oku ‘ikai koe Siasi.

‘I hano fehu’i fakafihi kiate ia ‘e he loea ‘a e Siasi Tokaikolo William Clive Edwards pe koe mo’oni na’e fai e folau ‘a e kau feinga pa’anga ki Nu’usila mo ‘Aositelelia pea talitali ‘e he Siasi Tokaikolo mo fakalele ‘a ‘enau feinga pa’anga ‘o a’u ki hono fakaheka mai ‘a e naunau langa mei Nu’usila pea na’a ne tali ‘oku ‘ikai ha’ane ma’u kiai ka na’e fai ‘a e folau ‘o taumu’a pe ki he kainga Kolomotu’a.

Na’e toe fehu’i kiate ia ‘e Edwards pe koe mo’oni na’e ‘alu mo e tohi ‘a e Tangata’eiki Palesiteni ki ‘Amelika ‘o ‘ave kia Faifekau Holomesi Mahe ke tokoni ‘a e kaingalotu ki he feinga pa’anga ‘a e Siasi ‘o Kolomotu’a pea na’a ne tali ‘io kiai ka na’e taumu’a pe ia ki he kakai Kolomotu’a pea ko kinautolu pe na’e lī pa’anga lahi.

Na’e ‘eke ‘e Edwards kiate ia pe na’e fai ‘a e feinga pa’anga ‘i San Francisco ‘i he ‘Api Siasi ‘o e Tokaikolo pea na’a ne tali ‘io ka na’e fakahoko ‘i fale hangē ha tau’anga me’alele pea ko e ’elia ‘oku si’isi’i ka 'oku 'ikai koha holo..

‘Oku ‘amanaki ke hoko atu ‘a hono fehu’i fakafihi ‘e Edwards ‘a Tui’onetoa ‘i he ‘aho Pulelulu 28 ‘o e uike ni hili ia hano toloi koe ‘uhinga koe kau atu ‘a Tui’onetoa ki he Fale Alea ‘i hono fatongia ko e Minisitā ‘o e Kapineti.