‘Ikai Tali Fakamaau’anga Tangi tangi ‘a e Feohi'anga Mou’i Fo’ou: Foki koloa ‘i Ha'ateiho ki he Siasi Tokaikolo Featured
Falelotu Siasi Tokaikolo 'Ia Kalaisi Ha'ateiho
16 Ma’asi, 2017. Kuo ‘ikai tali ‘ehe Fakamaau’anga Tangi ‘i he pongipongi ‘o e aho ni ‘a e tangi ‘a e Feohi’anga Mo’ui Fo’ou fekau’aki mo e Tu’utu’uni ‘a e Tu’i Fakamaau Lahi Owen Paulsen ‘i he ‘aho 9 Novema, 2016 ‘oku ‘ikai ha’anau totonu ki he koloa ‘a e Siasi Tokaikolo ‘Ia Kalaisi ‘i Ha’ateiho.
Na’e tangi foki ‘a e Mo’ui Fo’ou ki he Fakamaau’anga Tangi pea na’e tu’utu’uni aofangatuku ai ‘a e Fakamaau’anga Tangi ‘i he pongipongi ni ‘oku kei tu’u pe ‘a e Tu’utu’uni ‘a e Tu’i Fakamaau Lahi Owen Paulsen ‘i he ‘aho 9 Novema, 2016 pea koe koloa kotoa ‘e foki ia ki he Siasi Tokaikolo ‘Ia Kalaisi.
Ko e hopo foki ‘eni ‘i he koloa ‘a e siasi ‘a ia na’e mavae ua ‘i he ta’u 2013 pea taki ai ‘e Faifekau Sione Havili Maile ‘a e kau mavahe ‘o ui koe Feohi’anga Mo’ui Fo’ou pea nau feinga ke ma’u ‘a e koloa kotoa ‘a e Siasi Tokaikolo ‘Ia Kalaisi ‘i Ha’ateiho.
Na’e faka’ikai’i kotoa ‘e he kau Fakamaau Tangi ‘e toko tolu ‘o e Fakamaau’anga Tangi ‘a ia ko Moore, Blanchard mo Hansen ‘a e ngaahi makatu’unga tangi na’e fakahū atu ‘aki ‘a e tangi ‘a e Mo’ui Fo’ou.
Ko e tefito’i makatu’unga foki ‘o e taukave ‘a e Mo’ui Fo’ou ‘i he tangi ko’eni na’e foaki ‘e he Palesiteni Faifekau Dr. Liufau Vailea Saulala ‘a e koloa ‘a e Siasi kia Faifekau Sione Havili Maile ‘a ia na’e ‘ikai tali ‘eni ‘e he Fakamaau’anga Tangi ‘o makatu’unga ‘i he ‘ikai ha fakamo’oni kiai.
‘Oku mahino mai koe ngata’anga ‘eni ‘o e fakatonutonu fekau’aki mo e koloa ko’eni 'a ia 'oku mahino mo e tu'unga fakalao mei heni koe koloa katoa ‘i Ha’ateiho ‘oku ‘i he malumalu ia ‘o e Siasi Tokaikolo ‘Ia Kalaisi.
Na’e fakafofonga’i ‘a e Feohi’anga Mo’ui Fo’ou ‘e Laki Niu SC pea William Clive Edwards Sr. SC ma’a e Siasi Tokaikolo ‘Ia Kalaisi.
