Savea 'a e kau polisi fekau'aki mo e tu'unga malu kau 'Esia 'i Tonga ni Featured
Kau polisi lolotonga 'a e ‘opelāsio Great Wall
7 Fepueli, 2017. ‘Oku lolotonga fakahoko ha savea ‘a e Potugāue Polisi fekau’aki mo e kau ‘Esia ‘oku nau fakalele pisinisi ‘i Tonga ni ‘i he taumu’a ki he toe malu ange ‘enau pisinisi mo ‘enau mo’ui.
Kuo fokotu’u foki ‘e he Potungaue ha Kulupu pe Taskforce pea fakahingoa ‘a e ngāue ‘oku nau lolotonga fakahoko ko e Operation Great Wall ‘o kamata mei he faka’osinga ‘o e ta’u 2016. ‘Oku tokangaekina ‘i he ‘opelāsio ko’eni ‘a e lahi hono ‘ohofi, fakalavea’i mo kaiha’asi ‘a e koloa ‘a e kau ‘Esia kae tautautefito ki hotau kainga Siaina.
Fakatatau ki he fakamatala mei he Potungāue Polisi ‘oku peseti ‘e 3% ‘a e katoa ‘o e ngaahi launga ‘oku nau ma’u ‘oku fekau’aki ia mo e kau ‘Esia pea ‘oku fu’u fakatu’utamaki ‘a e ngaahi maumaulao ‘oku fakahoko fekau’aki mo e kainga ni.
‘I ha fakamatala ‘a e Tokoni Komisiona Polisi Pelenatita Fe'ao Vaisuai na’a ne pehē ai ‘oku nau faka’amu mo ngāue atu ‘i he ‘opelāsio ko’eni ke fakapapau’i ‘oku malu mo hao ‘a e kakai ‘o e fonua.
Na’a ne fakahā foki ko e savea ko’eni ‘oku taumu’a ke ‘ilo ‘a e ngaahi palopalema fekau’aki mo malu ‘a e kainga ni mo e ngaahi pole ‘oku nau fehangahangai moia kae tautautefito ki he tu’unga malu ‘enau ngāue mo ‘enau pisinisi ‘i he fonua ni.
