Fakafoki faka-Pule’anga ‘o Dean Jay Fletcher mei Ha’amoa ‘Amelika ki Tonga ^Featured

Ko e fakafoki mai foki 'eni 'o e matapule ni ke fakamaau’i felave’i mo e tukuaki’i na’a ne fakapoongi ‘a hono mali, ko Patricia Linne Kearney, ‘i he ‘aho 6 Siulai 2016, ‘i Neiafu, Vava’u.

2 Hili ‘a e ma’u ‘a e fakaha mei he Kimisiona Polisi na’e hola ‘a e faka’iloa mei Tonga ni pea kuo ne tu’uta ki Ha’amoa ‘Amelika, na’e fetu’utaki fakavavevave leva ‘a e ‘Ofisi ni ‘i he ‘aho 4 ‘Okatopa 2016 ki he kaunga ngaue ‘i he Potungaue Lao ‘a ‘Amelika ‘i Uasingatoni D.C. pea mo Ha’amoa ‘Amelika, ke kamata ‘a e ngaue ki hono faka-foki faka-Pule’anga ‘o e Faka’iloa ki he Pule’anga ni ke fakamaau’i ia felave’i pea mo e ngaahi hia kuo faka’ilo’aki ia.

3 Kuo faka’ilo’aki ‘a e Faka’iloa ‘a e hia ko e fakapo, pea talifaki ki ai ‘a e tamate tangata pe fakatupu lavea lahi, pehe ki he kaunoa ‘i ha founga fakamaau totonu ‘o ha fai hia, pea mo e hia ‘e ua ki he hola mei hono tauhi faka-lao ia ‘e he Kau Polisi Tonga.

4 ‘Oku lolotonga ‘i ai ‘a e talite ki he fakafoki-faka-Pule’anga ‘a e kau faihia ‘i he vaha’a ‘o Tonga pea mo ‘Amelika, ‘a ia na’e fakapapa’u’i ‘i he ‘aho 13 ‘Epeleli 1977 ‘oku ngaue ki he va ‘o Tonga mo ‘Amelika. ‘Oku malava ke ngaue’aki ‘a e Talite ni ki Ha’amoa ‘Amelika he ko e taha ia ‘a e ngaahi vahenga-fonua ‘o ‘Amelika.

5 Hili ‘a e ma’u ‘a e tali mei he kaunga ngaue mei ‘Amelika, na’e ‘oatu ‘i he ‘aho 5 ‘Okatopa ‘a e tohi kole mei he ‘Ofisi ‘o e ‘Ateni Seniale, ma’ae Pule’anga Tonga, ke foaki mai mei he Fakamaau’anga Fetalali ‘o ‘Amelika ha tohi puke faka-taimi ‘o e Faka’iloa, kae toki ‘oatu ha ha tohi kole faka-‘ofisiale ke faka-foki faka-Pule’anga ke toki fakafou ‘i he founga faka-tipilometika ki he Pule’anga ‘Amelika.

6 ‘Oku lolotonga tatali ‘a e ‘Ofisi ‘o e ‘Ateni Seniale ki ha fakaha mai mei he kau ma’u mafai ‘i ‘Amelika felave’i pea mo e tukunga ‘o e tohi kole ki he tohi puke faka-taimi ‘o e Faka’iloa, pea pehe ki hono fakapapau’i ‘a e founga mo e ngaahi fiema’u faka-lao ke fa’u’aki ‘a e tohi kole ki ‘Amelika ke fakafoki faka-Pule’anga mai ‘a e Faka’iloa mei Ha’amoa ‘Amelika. ‘I he taimi tatau ‘oku lolotonga teuteu ‘e he ‘Ofisi ni ‘a e ngaahi fakamatala anga maheni ki ha tohi kole faka’ofisiale ke fakafoki faka-Pule’anga ‘o e Faka’iloa, ke toki ‘oatu ‘i he founga faka-tipilometika ki he Pule’anga ‘Amelika ‘hili hono fakapapau’i ‘a e founga mo e ngaahi fakamatala ‘oku fiema’u ‘e he kau ma’u mafai ‘i ‘Amelika.

7 Ko e kole ke fakafoki faka-Pule’anga ha taha faihia ko e founga ‘oku faingata’a faka-lao, pea ‘oku kau ai ‘a e fakamaau’i aofangatuku ‘a e ngaahi fehu’i faka-lao mafatukituki ‘i hono ngaue’aki ‘a e ngaahi founga faka-lao kotoa pe ‘oku ngaue’aki i he fakamaau’anga muli, pea koia ai ‘oku ngalingali ‘e ‘i ai ‘a e taimi lahi pea toki kakato ‘a e ngaue ki ai.

-Office ‘Ateni Seniale Leʻoleʻo mo e Talekita ki he Ngaahi Talatalaaki Hia ‘a e Puleʻanga