Kei hohoko atu pe kumi ki he pōpula hola mei ‘Amelika Featured
Komisiona Polisi 'a Tonga Steve Caldwell
2 ‘Okatopa, 2016. ‘Oku kei hokohoko atu pe a’e fekumi ‘a e kau polisi ki he pōpula hola mei ‘Amelika ‘a ia na’e hola mei he tauhi fakalao ‘e he kau Polisi ‘i Vava’u. Ko e matāpule foki ‘eni ko Dean Jay Fletcher ‘a ia na’e tauhi fakalalo ‘e he kau Polisi ‘o tukuaki’i ki he’ene fakapoongi hono mali.
Na’e hoko foki ‘a e fakapō ‘oku tukuaki’i kiai ‘a Fletcher ‘i he konga loto pe ‘o e ta’u ni ‘i Vava’u lolotonga ‘a e ‘a’ahi ‘eve’eva mai ‘a e ongo matu’a ni ‘i hona vaka ‘iote ‘oku ‘iloa koe Sea Oak.
Na’e hola foki ‘a e matāpule ni mei malumalu ‘o e kau Polisi ‘i he ‘aho 29 Sepitema pea na’e tuli ‘e he vaka ‘o e kau Polisi ‘i Vava’u ‘o ma’u ki he kilomita nai ‘e 16 ki he fakatokelau hihifo ‘o Vava’u.
Na’e fetakai ‘a e kau Polisi mo e matāpule ni ‘o fakamanamana ‘a e matāpule ni tene tutu ‘a e vaka ‘o e kau Polisi pea fana mo e felea ki he vaka ‘o e kau polisi ‘o tupui ai hono ta’ofi hano puke ‘e he kau polisi ‘a e vaka ni.
‘Oku mahino pe foki na’e ‘ikai ke mateuteu pe fe’unga ‘a e naunau ‘i he vaka ‘o e kau Polisi ke fakahoko ha ngāue ki hono puke ‘o e matāpule ni.
Na’e fakahoko leva e fetu’utaki ki he ngaahi folau vakapuna ‘i he ‘elia ni pea pehe ki he ngaahi ma’u mafai fakavaha’a Pule’anga. ‘Oku kau atu foki mo e va’a ‘o e Va’a Tautahi ‘a Tonga ki he fekumi ka ‘oku fakahoko.
‘I ha fakamatala ‘a e Komisiona Polisi ‘a Tonga Steve Caldwell na’a ne fakahā ai ‘oku kei hokohoko atu pe ‘a e fekumi pea ‘oku fakahoko mo e fakatotolo ki he tupu’anga ‘o e hola ‘a Fletcher.
