Tanaki atu ta’u ‘e 16 ki he tautea lolotonga ‘o Sione Kefu Kalavi ‘o Ma’ufanga ^Featured

Na’e hola foki ‘a Sione Kalavi mei he Pilīsone Hu’atolitoli ‘i he ‘aho 4 ‘o ‘Aokosi pea na’e toki ma’u pe ‘e he kau Polisi ‘i he 'aho Pulelulu uike kuo’osi 17 'o 'Aokosi ‘i he Hala Taufa’ahau ‘i he Fanga ‘o Pilolevu fakatatau ki he ongoongo ‘a e Letiō Tonga. 

Na’e lolotonga ngāue popula foki ‘a Kalavi ki he ta’u ‘e 4 ‘a ia na’e kamata mei he mahina ko Sune 2014 pea ‘oku ‘amanaki ke toki ‘osi ki he mahina ko Sepitema 2018. Ko’ene ngāue popula ‘eni ki he fakalavea ‘o tupu ai ha pekia ha matāpule Siaina ‘i Halaleva ‘i he 2014 pehe ki he kaiha’a mo e haefale.

Na’e fakahoko foki ‘e Kalavi ‘a e ngaahi hia kehekehe lolotonga ‘a ‘ene hola ko’eni pea na’e fanongonongo foki mo fakatokanga ki he kakai ‘o e fonua ‘a e hola ko’eni ‘a Kalavi ‘o makatu’unga ‘i he fakatu’utamaki ki he kakai ‘o e fonua ‘a e matāpule ni fakatatau ki hono hisitōlia faihia.

Fakatatau ki he fakamatala ‘a e ongoongo ‘a e Letiō Tonga na’e kamata ngāue popula pe ‘a Kalavi ‘i hono ta’u 14 pea koe tu’u ‘a e ‘ea ki he kaha’u ‘e ki’i fuofuoloa ‘a e fakapaea ‘a e matāpule ni ‘i he Pilīsone Hu’atolitoli.