‘Ikai tali 'e he Fakataha Tokoni 'a e Tangi ‘a Lord Fielakepa Featured
Tupou Tongaliuaki Filo’aulo Aleamotu’a mo 'ene Fine'eiki Mele Simiki Aleamotu'a 'i tu'a he Fakamaau'anga Lahi 'i Tisema 2015
Nuku’alofa, 16 ‘Aokosi 2016. Kuo ‘ikai ke tali ‘e he Fakataha Tokoni ‘a ‘Ene ‘Afio ‘a Tangi ‘a Lord Fielakepa fekau’aki mo e tu’utu’uni ‘a e Fakamaau Lahi 'i he Fakamaau’anga Kelekele ‘i he ‘aho 4 ‘o Tisema 2015.
Ko e tu’utu’uni foki ‘eni 'a e Fakamaau Lahi ko Micheal Scott ‘o fakata’e’aonga’i mo fakaha ‘oku ‘ikai fakalao hono fakanofo ‘o Tongapo’uli Aleamotu’a ki he Hingoa Nopele Tukufakaholo Fielakepa.
Ko Tongapo’uli Aleamotu'a ko e foha si’isi’i taha ia ‘o ‘Eiki Nōpele Fielakepa Longolongo'atumai (kuo ne pekia) mo Lady Tuna Kaimanu Fielakepa ‘a ia ‘oku kei laumalie lelei pe.
‘Oku kau foki ‘a e hingoa Fielakepa ‘i he Hou’eiki lalahi ‘o e fonua pea ‘oku kau foki ki he Ha’a Havea Lahi. Ko Tongapo’uli Aleamotu’a ‘oku lolotonga fakahokofatongia koe Pule Lahi ia ‘o e Kau Tau ‘a ‘Ene ‘Afio.
‘Oku mahino foki mei he tu’utu’uni ‘a e Fakataha Tokoni 'a 'Ene 'Afio na’e fakahoko ‘i he ho’ata ‘o e ‘aho ni ‘a e mafai ‘o ‘Ene ‘Afio 'i he tu'utu'uni 'a e Konisitutone kene aofangatuku ha tangi mei Fakamaau’anga Kelekele 'i he Fakataha Tokoni fekau’aki moha tu’utu’uni fekau’aki mo e Kelekele pehe ki he ngaahi Hingoa Tukufakaholo.
Ko e fakatonutonu foki ‘eni ‘i hono ‘eke ‘e Tupou Tongaliuaki Filo’aulo Aleamotu’a ‘a ia koe foha ia ‘o e ta’okete ‘o Tongapo’uli Aleamotu’a ko Tangaki Taulupe Aleamotu’a ka kuo ne pekia ‘a ‘ene totonu tukufakaholo ki he Hingoa Nopele Fielakepa.
‘Oku mahino mai foki mei he tu’utu’uni ko’eni ‘a e Fakataha Tokoni ko Tupou Tongaliuaki Filo’aulo Aleamotu’a 'a e 'ea pea 'oku ne ma'u 'a e totonu fakalao mo faka-tukufakaholo ki he hingoa Nopele Tukufakaholo Fielakepa.
14 comments
-
Aia kapau na'e hala, ta 'oku hala 'a 'Ene 'Afio, tonu ke faka'ilo a Tupou VI pe ko'ene kau fale'i? Case maalie eni.
Fakanofo Higoa ehe'ene Afio pea ko e alu atu eni a e Tangi ko 'Ene 'Afio pe oku ne decline mai. Oku fihi e me'a ni! -
'Oku tau faka'apa'apa kotoa pe foki ki he pule 'a e Lao pea 'oku kei Tonga pe Tonga. Neongo koe fakatonutonu faka famili 'eni pea kuo lava ka 'oku 'i ai e faka'ap'apa lahi ki he ongo tafa'aki.
-
Mooni lahi to koee oku pehee ka Koeh ne fknofo Ai hingoa ia tongapouli Hoooi Fkofa
-
Ta koee 'e pehee ka koeha ne fakanofo ai a Tongapo'uli ki he hingoa, e sii matahoa ia mo e Famili he aho ni, faka'ofa mo'oni.