Sikolasipi 'a e Poloseki 'a e ADB mo e Pule'anga ke taliteke'i feliuliuaki 'a e 'ea Featured
‘I he ta ‘oku ‘asi ‘i he tepile fuopotopoto mei to’omata’u: David Fay (ADB), Mrs. Lupe Matoto (Acting CEO, MEIDECC) lolotonga fakamo’oni e tohi aleapau, Ms. Linda Lal (USP), Mr. Fangufangumana Latu (USP), Mr. ‘Isikeli Oko (MET)
SIKOLASIPI ‘A E POLOSEKI ‘A E PANGIKE FAKALAKALAKA ‘O ‘ESIA (ADB) MO E PULE’ANGA TONGA KI HONO TALITEKE’I ‘O E HA’AHA’A ‘O E FELILIUAKI ‘A E ‘EA [CLIMATE RESILENCE SECTOR PROJECT (CRSP)]
Fa’u ‘e Helu (CRSP Education Specialist)
Ko e CRSP ‘oku fakamalumalu ‘i he MEIDECC pea moe MoFNP. ‘Oku fe’unga mo e sikolasipi ‘e 29 ‘oku lolotonga fai e ngāue ki ai pea ‘oku kei hoko atu pe alea na’a lava ke toe fakalahi.
Ko e sikolasipi ako BSc ‘e 20 ‘o taki 10 e saienisi ‘o e ‘atakai (environmental science) mo e saienisi ‘o tahi mo hono ngaahi me’a mo’ui (marine science) ‘a ia ne fakamo’oni hono tohi aleapau mo e USP ‘i he ‘aho Pulelulu, ‘Okatopa 26 (Vakai ki he ta).
‘E kamata ‘i he 2017 hono faiako’i ‘o e ongo polokalama ‘i he kemipasi ‘o e USP ‘i ‘Atele ‘o ‘osi ki he 2019. ‘E faiako’i foki ‘ehe USP ‘i Tonga ni mo e ongo polokalama kehe ‘e 2 ko e bio-chem pea moe STAP ‘o kamata kotoa ‘i he 2017.
Ko e STAP ‘oku fakataumu’a ia ki he kau faiako ‘a ia ne ‘osi ma’u ho nau diploma mei he kolisi fakafaiako pea koe polokalama ‘oku ta’u pe ‘e 2 kae ma’u honau mata’itohi BSc. Ko e taumu’a foki ke fakalaka’i e tu’unga ‘o e ‘ilo ‘i he saienisi ‘a ‘e tau kau faiako ‘i Tonga ni.
‘Oku ‘i ai foki e ngaahi ‘ulungaanga fo’ou ‘oku ‘asi mai mo e sikolasipi ni:
(1) Ko e toki ‘omi eni ‘e ha kautaha tokoni ha sikolasipi ki Tonga ni. Ko e anga maheni foki koe ngaahi pule’anga pe hange’ ko Nu’u Sila, ‘Asitelelia, Siaina, Siapani;
(2) Ko hono toki faiako’i eni ‘i Tonga ni ‘e he USP ha’a nau polokalama ako kakato;
(3) Ko hono toki ‘ave eni ki tu’a mei Fisi ‘e he USP ha’a nau polokalama ako he ngaahi lesoni saienisi.
Na’e ‘ikai foki ke faingofua hono alea’i mo e USP ke fakahoko e ngāue ko eni. Ko e me’a foki ‘oku fai ki ai e tokanga ke fakafiemalie ‘a e polokalama ki he USP. ‘A ia ‘oku ‘ikai ngata pe ke ma’u ha ola lelei mei he tafa’aki fakaako ka ke ma’u foki mo ha tamaiki ako tokolahi fe’unga ke nau lesisita ‘i he ngaahi polokalama.
Ko e folau mai ‘a e kau faiako mei Fisi ‘oku mahino ‘e fai e fakamole pa’anga ki ai ‘ae USP pea ‘oku fai leva e faka’amu ke tokolahi e tamaiki ‘e lesisita kae lava ke huhu’i e fakamole.
Ko e faingamalie matu’aki mahu’inga foki eni he ‘oku lava ‘e he silini tokoni ke ako’i ha kauako tokolahi ‘i hono fai e ako ‘i Tonga ni ka ‘o kapau na’e ‘ave ki Fisi pe kiha toe fonua ‘i muli koe ki’i tokosi’i pe ‘e lava ‘o ‘ave fakatatau ki he lahi ‘o e seniti.
‘Ikai ko ia pe foki ka koe faingamalie ki he ‘etau fānau tautautefito ki he fānau fefine ke nau nofo pe ‘i ‘api ‘o fai pe heni ‘e nau ako koe tapuaki lahi mo ia. Ko e foomu tohi kole ‘oku ma’u pe mei he Va’a Sikolasipi mei ‘Ofisi Ako. ‘E tapuni foki e tohi kole ki he ‘aho 14 ‘o Novema, 2016.
Hange’ ko ‘eku lave ‘i ‘olunga ‘oku kei hoko atu pe alea pea ‘oku kau foki heni mo ha ngaahi sikolasipi Postgraduate Diploma mo e MSc pea ko ha ngaahi sikolasipi ‘e toki hu mai kuopau pe ke tuku atu ke laau’ilo ki ai e fonua.
