Toko 4 kau kanititeiti ki he teu Fili Si'i Vahenga Fili Vava'u 14
24 Fepueli 2024. Kuo fakapapau'i mei he Komisoni Fili kuo maau 'a e lesisita 'a e kau Kanititeiti 'e toko 4 kenau veipa ki he sea 'o e Fkafofonga Fale Alea ma'a e Vahenga Vava'u 14.
Ko e teu foki 'eni ;'a e Fili Si'i ke fetongi 'a e Sea na'e fakafisi mei ai 'a Dr. Saia Ma'u Piukala kane hiki atu 'o ngaue koe taha 'o e kau Tokoni Talekita Seniale 'a e Kuataha Mo'ui 'a mamani.
Ko hono fakapapau'i mai 'eni 'a e kau Kanititeiti hili 'a e tapuni 'a e lesisita 'i he efiafi Tu'apulelulu 22 'o Fepueli.
Ko e kau Kanititeiti leva 'eni:
1. Viliami Tinitali Piukala, Pangaimotu
2. Sione Fataua Halatanu, Hunga
3. Moále Ótunuku, Longomapu
4. Matini Fatanitavake Maáfu ó Veikune Tuítonga Veikune, Longomapu
Ko e Vahenga Fili Vava'u 14 'oku kau kiai 'a e ngaahi kolo mo e motu ko'eni: Pangaimotu, ‘Utulei, ‘Utungake, Talihau, Taoa, Vaimalo, Tefisi, Tu'anuku, Longomapu, Taunga, Kapa, ‘Otea, Falevai, Matamaka, Nuapapu, Lape, Ovaka, Hunga, Holeva, Koloa, Olo'ua, Ofu, pea mo Okoa.
Ko e teu Fili Si'i ko'eni 'oku 'amanaki fakahoko 'i he 'aho 8 'o Ma'asi.
