Fakamalōlō'i fakataimi Piveni Piukala mei he Fale Alea

Ko hono fakamalōlō'i fakataimi ko 'eni 'o Piukala hili hano fokotu'u mai mei he Komiti Tu'uma'u ki he Ngaahi Totonu 'a e Fale Alea (Priviledge Committee) 'oku mo'oni 'a e launga na'e fakahoko 'e he 'Eiki Palēmia Hon. Hu'akavameiliku 'i he 'aho 7 'o 'Aokosi 2023 na'e anga ta'e faka'apa'apa 'a e Fakafofonga kiate ia lolotonga 'a e feme'a'aki 'a e Fale Alea.

Ko e lāunga foki 'eni fekau'aki mo e lea 'a e Fakafofonga ki he Palemia mo 'ene kaikaila 'o pehe "koe pa'anga pe ho'o kui teke fa'iteliha kiai" lolotonga 'a e feme'a'aki 'a e Fale pea na'e fakamafola 'eni 'i he ngalu'ea mo e ope i he 'aho 7 'o 'Aokosi 'o e ta'u kuo 'osi.

'Oku mahino foki mei he Lipooti 'a e Komiti na'a nau vakai'i 'a e 'ātakai 'o e launga ko'eni 'o kau ai hano tā mo hono toe siofi hono hiki lea mo e 'ata 'o e feme'a'aki pea fakakaukau'i mo e ngaahi puipuitu'a 'o e lea mo e fakafōtunga pehe ki he ngaahi māfihunga 'a e sino mo e le'olahi 'o e lea na'e fakahoko lolotonga 'a e feme'a'aki.

Na'e aofangatuku 'e he Komiti 'oku malava 'o fakamo'oni'i 'a e launga pea na'e fokotu'u atu ai pe ki he Fale Alea ke tautea 'a e Fakafofonga fakatatau mo e Kupu 108 (1) mo e Kupu 3 pea na'e fakahoko 'a e tautea fakatatau ki he Kupu 49  'o e Ngaahi Tu'utu'uni 'a e Fale Alea.

Na'e loto 'a e toko 19 ke tali 'a e Lipooti ko'eni mei he Komiti Tu'uma'u ki he Ngaahi Totonu 'a e Fale Alea fakataha mo hono tautea 'o e Fakafofonga Tongatapu 7 pea na'e 'ikai ha taha 'e fakahāloto 'oku ta'eloto ki he Lipooti 'a e Komiti.

'Oku matu'aki mahu'inga foki 'a hono ngāue'aki 'a e Ngaahi Tu'utu'uni ki he Ngāue 'a e Fale Alea kene malu'i 'a e ngeia 'o e Fale pehe ki hono kau memipa.