‘Ilonga ‘i he Fakamaau’anga fakautuutu hono ma’u ‘a e faito’o konatapu Featured
4 'Aokosi, 2020. ‘Oku ‘ikai ke maholoholo ‘a hono puke ‘e he kau polisi ‘a kinautolu ‘oku nau ngāue’aki mo fetuku holo ‘a e faito’o konatapu ‘i he fonua.
‘Oku mahino mei he setisitika ‘a e Fakamaau’anga ‘oku lahi ‘a e ngaahi hopo ‘oku ui ‘i he Fakamaau’anga Polisi ko e hopo fekau’aki mo e faito’o konatapu pea toki mei 'i ai 'a hono tuku hake ki he Fakamaau'anga Lahi.
‘I ha fakamatala falala’anga mei he Fakamaau’anga ‘oku laka hake he peseti ‘e 50 ‘o e ngaahi hopo kuo ui ‘i he Fakamaau’anga Polisi ‘i he kamata’anga ‘o e uike ni koe hopo fekau’aki mo e faito’o konatapu.
Ko e faka’ilonga ‘eni ‘oku ne ’omai ‘a e fakatokanga ki he kau taki ‘o e fonua ke toe fakamamafa’i mo ‘oange ha tokanga makehe ki he kaveinga ko’eni he koe taha ia ‘o e ngaahi fiema’u vivili ‘a e fonua.
‘Oku ‘ikai ngata ai ka ‘oku lolotonga tu’uaki ‘i he Fakamaau’anga ha Fakamaau Lahi makehe ke nofo taha pe ki hono hopo’i ‘o e faito’o konatapu ‘a ia koe toe faka’ilonga pe ‘eni ‘a e tokanga makehe ‘oku tuku ki he kaveinga ko’eni ‘e he Fakamaau’anga.
‘Oku mahino foki ‘oku ngali hanganoa ‘a e fonua he tokanga ki he ngaahi kaveinga ‘oku ne tohoaki ‘a e tokanga he lolotonga ni hange koe COVID-19 mo e ngaahi kaveinga faka-politikale kae ‘ikai ke fu’u fakatokanga’i ‘a e ngaolo hake ‘a e ngata huhu kona ko’eni koe faito’o konatapu ‘a ia ‘oku fakalilifu ‘ene fakatupu maumau ki he fonua pehe ki he hako tupu.
'Oku mahu'inga ke fakatokanga'i 'eni pea ke 'oua 'e hoko 'a e tokanga makehe ange 'a e Pule'anga ki he COVID-19 mo e ngaahi kaveinga kehe 'i he fonua ke me'angāue'aki 'e kinautolu 'oku nau ngaue'aki mo tufaki 'a e faito'o konatapu 'o pehe tokua 'oku hanganoa 'a e fonua.
‘Oku fakamālō’ia ai pe ‘a e ngāue malohi ‘a e va’a makehe ‘a e Potungāue Polisi ki he faito’o konatapu pea ‘oku fiema’u ‘a e fepoupouaki ‘a e ngaahi kupu fekau’aki telia ‘a e malu ‘a e fonua mo hono kakai.
'Oku toe mahu'inga foki ke fai hano fakakaukau'i 'e he kau fa'u lao 'a e ngaahi tautea 'oku toe mamafa ange ke tokoni ki hono fakangata mo ta'ota'ofi 'a e fu'u peau fakatu'utamaki 'oku hake ko'eni 'i he fonua.
2 comments
-
Na'a ku pehee 'eau ko e loka e kau'aa fonua 'e holo ai e faito'o konatapu he'eku fakakaukau 'oku hu mai mei muli, kou sio he taimi ni, 'oku tuai e taimi tau mai 'a e vakatahi mei muli 'oku kei tufaki holo pe me'a ni, pea mahino kiate au 'oku ngaohi pe 'i Tonga. Kou sio atu 'oku 'aonga ia ketau toe foki pe kitautolu 'o loka he 8pm ki he 6pm ke ma'u kotoa e 'u peito 'oku fai ai e ngaohi 'o e me'a ni.
-
Vaka'i pe kau polisi moe kau ma'olunga he pule'anga ,tomu'a fai ha fekumi pe ko hai 'ia kinautolu 'oku ne fai hono fkhaofi mo fetuku takai holo 'ae faito'okonatpu..he'e fkpiko hono puke atu fanga ki'i va'ava'a kpau he'ikai ma'u e fu'u tefito ia..he'e kei tahuli mai pe ia..ko 'ene ma'u pe tefito ko 'ene ngataa ia.
Pea taha tonu ke tautea mate pe ngauepopula kihe mate ha taha 'oku ma'u moha faito'okonatapu..koe 'uhi ke mahino koe me'a ko iaa 'oku kovi 'aupito..k 'oku fu'u ma'ama'a e fanga ki'i tautea 'oku 'oange kihe kakai 'oku ma'u 'oku nau fetuku holo...pea tenau kei fai pe 'enautolu koe 'uhi koe ki'i ta'u pe fiha kuo 'ataa mai ia toe hoko atu pe me'a tatau.