'Ikai fakapotopoto ke toe afe mai ha vaka meili ki Tonga ni ^Featured

29 Fepueli, 2019.

'Etita,

'Oku ou faka'apa'apa mo fakahoko atu he tohi ni 'eku loto mamahi mo ta'efiemalie hono faka'ata ke afe mai 'a e vakameili ko'eni na'e no'o 'i he Uafu ko Vuna 'aneafi.

'Oku lolotonga 'i ai e fu'u mahaki faka'auha fakalilifu koe Kolonavailasi 'oku hu'u mei Siaina pea feinga 'a mamani ke faka'ehi'ehi mei ai kae fakangofua 'a e fu'u vaka ko'eni ke afe mai.

Na'a ku fanongo 'i he ongoongo na'e 'i ai 'a e vaka meili na'e afe 'i Siapani he mahina kuo 'osi pea na'e ma'u ai 'a e tokolahi 'i he mahaki ko'eni pea na'e kolonitini kinautolu 'i Siapani

'Oku tau fu'u tokosi'i pea ka hu mai e mahaki he kau folau 'o ha vaka pehe ni ko e 'auha ia 'a e fonua ni.

'Oku ou manatu ki he talanoa 'a e matu'a ki he mahaki faka'auha na'e hake 'i Tonga ni 'i he kamata'anga 'o e senituli 20 ko fou mai he vaka na'e tu'uta mei muli ki Tonga ni pea na'e lahi e mo'ui na'e mole ai.

Na'e ta'ofi 'e he Pule'anga 'a e vaka meili 'e 4 mei ha'a ne tu'uta 'i Tonga ni 'i he 'aho 12 'o e mahina ni ka 'oku fehu'ia pe koe ha na'e faka'ata ai 'a e vaka ko'eni 'aneafi?.

Kapau koe vivili 'eni ha ni'ihi tokosi'i 'i he tafa'aki takimamata pe koha tafa'aki pe pea 'oku ou pehe 'oku fakavalevale lahi 'eni mo e siokita ke mahu'inga ange 'a e pa'anga he'etau mo'ui.

'Oku ou faka'amu ke tu'uma'u 'a e Pule'anga he'enau tu'utu'uni telia 'a e mo'ui 'a e kakai he 'oku tau tokosi'i pea 'ikai ketau mateuteu ki he vailasi ko'eni fakapa'anga mo fakafaito'o.

Kapau 'oku 'i ai ha 'uhinga ia 'oku ma'olunga ange ki he afe mai ko'eni 'a e vaka meili ni pea 'oku fiema'u ke 'omai ke 'ilo kiai 'a e kakai 'o e fonua.

Ko e ta pe 'eni e lango kei mama'o he 'oku 'ikai ke fakatau'aki ha pa'anga 'a e mo'ui

Faka'apa'ap Atu,

Uafu Ko Vuna

Kolofo'ou